ആര്‍പ്പേയ്!!!

സലിം കുമാറിന്റെ കവിയെ കണ്ടപ്പോൾ..!

2011-04-19T08:02:00.000-07:00

പുഴയോരത്തെ പുൽത്തകിടിയിൽ കാറ്റേറ്റ് അങ്ങനെ കിടക്കാൻ എന്തു സുഖം! പുല്ലിൽ വിരിച്ച തോർത്തിലൂടെ പുല്ല്ലിന്റെ നനവ് ദേഹത്തേയ്ക്ക് അരിച്ചു കയറുന്നു. കൂട്ടുകാരെല്ലാം പോയിക്കഴിഞ്ഞിരുന്നു. നിരഞ്ജൻ ഒറ്റയ്ക്കായി. ഒരു തണുത്ത കാറ്റ് ഇലകളെ തഴുകി ഈറൻ വിരിച്ച് കടന്നു പോയി. പണ്ടൊരു വെക്കെഷനിലെ പുഴയോരത്തെ കൂടൽ അയാൾ ഓർത്തു. വൈദ്യരായിരുന്നു മുഖ്യ താരം! വോഡ്ക കരിക്കിനകത്ത് ഒഴിച്ച് കപ്പയും മീനും കൂട്ടി കഴിച്ചായിരുന്നു ആഘോഷം! ഇപ്പോൾ വൈദ്യരില്ല. പെട്ടന്നായിരുന്നു മരണം! എത്ര പെട്ടെന്നായിരുന്നു താൻ വൈദ്യരെ മറന്നത്! നിരഞ്ജനോർത്തു. അന്ന് കഥ പറയുമ്പോൾ സിനിമ കണ്ടപ്പോൾ അതിലെ സലിം കുമാറിന്റെ കവിയെ കണ്ടപ്പോളാണു നിരഞ്ജൻ താനൊരിക്കലും മറക്കരുതാത്ത വൈദ്യരെ വീണ്ടും ഓർത്തത്! പോസ്റ്റ് ഗ്രാജുവേഷനു അകലെയുള്ള മെഡിക്കൽ കോളേജിൽ പഠിക്കാൻ പോയതോടെ നിരഞ്ജന്റെ നാടുമായുള്ള ബന്ധം കുറഞ്ഞിരുന്നു!

വൈദ്യരെ എന്നായിരുന്നു ആദ്യം കണ്ടത്? അയാളോർക്കാൻ ശ്രമിച്ചു! ഓർമ്മയ്ക്കാൻ കഴിയുന്നില്ല. ഹൈസ്കൂളിൽ പഠിച്ചിരുന്ന സമയത്ത് വീടിനു മുൻപിലൂടെ നീണ്ട ഷർട്ടിട്ട് മുണ്ടിന്റെ ഒരറ്റം കക്ഷത്തിൽ വച്ച്, മേൽമുണ്ട് തോളിലിട്ട് ഒരൽ‌പ്പം മുന്നോട്ടാഞ്ഞ് അതിവേഗം നടന്നു പോകുന്ന ആ ആറടിയിലധികം പൊക്കമുള്ള അറുപതുകാരനെ ഒരിക്കൽ കാണുന്നവർ പിന്നെ മറക്കില്ല! വെറ്റിലക്കറ പുരണ്ട പല്ലുകൾ കാട്ടി ഹ..ഹൊ..ഹാ എന്ന കോഴി കൊക്കുന്നപോലുള്ള റ്റ്രേഡ്മാർക്ക് ചിരിയും ആരുടേയും ഓർമ്മയിൽ തങ്ങി നിൽക്കുമായിരുന്നു!

ഹൌസ് സർജൻസി സമയത്താണ് നിരഞ്ജൻ വൈദ്യരെപ്പറ്റി കൂടുതൽ അറിഞ്ഞത്. ഡേവിസ്. കെ. ജോർജ്ജ് (ഒരു ചെറു പയ്യനെന്നേ പേരു കേട്ടാൽ തോന്നൂ!) എന്നാണ് വൈദ്യരുടെ ശരിപ്പേരെന്നും മൃഗവൈദ്യത്തിലെ പാണ്ഡിത്യമാണു വൈദ്യരെന്ന ആ ഇരട്ടപ്പേരു വരാനുള്ള കാരണമെന്നുമൊക്കെ അറിഞ്ഞത് അക്കാലത്താണ്. അക്കാലത്ത് നിരഞ്ജന്റെ വീടിനടുത്തുള്ള “സിറ്റി”യിൽ വൈദ്യർ ഒരു മൊബൈൽ (പേരിനു നാലു ചക്രമുണ്ടെന്നല്ലാതെ നീങ്ങുകയില്ല!) മുറുക്കാൻ കട തുടങ്ങിയിരുന്നു. പോലീസ് സ്റ്റേഷനും ഒന്നു രണ്ടു ബാങ്കുകളും കുറെ കടകളുമുള്ള സിറ്റിയിൽ നാലു ചക്രമുള്ള ഒരു 6 അടി X 4 അടി സൈസിലുള്ള ചെറിയ കട. അഞ്ചാറു മിഠായി ഭരണികൾ, സിഗരറ്റ്, ബീഡി, മുറുക്കാൻ, നാരങ്ങാവെള്ളം, മാ വാരികകൾ ഇത്യാദി സാധനങ്ങൾ മാത്രമാണുണ്ടായിരുന്നത്. പക്ഷേ കടയുടെ മുൻപിൽ തന്നെ വച്ചിരുന്ന ചെറിയ ബോർഡിൽ ഇങ്ങനെ എഴുതിയിരുന്നു “മംഗളപത്രങ്ങൾ, പരാതികൾ, ആപ്ലിക്കേഷനുകൾ, എഴുത്തുകുത്തുകൾ, ഉപദേശങ്ങൾ, മൃഗവൈദ്യം എന്നിവയ്ക്ക് മടികൂടാതെ സമീപിക്കുക : ഡേവിസ് കെ. ജോർജ്ജ്!”

മെഡിക്കൽ കോളേജ് ഹോസ്റ്റലിലെ ചീട്ടുകളിയിൽ കിട്ടുന്ന പൈസായെല്ലാം നിരഞ്ജൻ നേരെ കൊണ്ടുവന്ന് വൈദ്യരുടെ കടയിൽ ഡിപ്പോസിറ്റ് ചെയ്യുമായിരുന്നു അന്നൊക്കെ. (ഹോസറ്റലിലേയും നാട്ടിലേയും കാശുവെച്ചുള്ള ഫ്ലാഷ്, കീച്ച്, റമ്മി, ഗുണ്ട് കളികളിൽ അഗ്രഗണ്യനായിരുന്നു നിരഞ്ജൻ!) പിന്നെ സിഗരറ്റ്, നാരങ്ങാവെള്ളം, സോഡാ എന്നിവയെല്ലാം ആ പൈസയിലായിരുന്നു വാങ്ങിയിരുന്നത്. (എന്തിനു മെഡിക്കൽ കോളേജുകാർ ഏതോവനപ്രദേശത്ത് ആദിവാസി കോളനിയിൽ മെഡിക്കൽ ക്യാമ്പു നടത്തിയപ്പോൾ ആദിവാസി മൂപ്പനു വൈറ്റമിൻ ഗുളിക നൽകി പകരം കിട്ടിയ സമ്മാനമായ ഒന്നാന്തരം നീലച്ചടയൻ കഞ്ചാവും സൂക്ഷിക്കാൻ നിരഞ്ജൻ ഏൽ‌പ്പിച്ചത് വൈദ്യന്റെയടുത്തായിരുന്നു!) അങ്ങനെയുള്ള വിസിറ്റുകളിലാണു വൈദ്യരുടെ കവിതാരചനാ വൈഭവമൊക്കെ നിരഞ്ജനു മനസ്സിലായത്. സംസ്കൃതം കുറെയൊക്കെയും മാതംഗലീലയും ഹസ്തായൂർവേദവുമൊക്കെ പകുതി വരെയും പഠിച്ചിട്ടൂണ്ടെന്ന് വൈദ്യർ അവകാശപ്പെടുമായിരുന്നു. നോർത്ത് ഇൻഡ്യയിൽ മാത്രമുള്ള ഏതോ ഒരു പാർട്ടിയുടെ കേരളാഘടകത്തിന്റെ വലിയ കുണാണ്ടർ കൂടിയായിരുന്നു ആ മഹാൻ! (സലിം കുമാറിന്റെ കവി നാട്ടിൽ തിരിച്ചുവന്നതു പോലെ വൈദ്യർ നോർത്ത് ഇൻഡ്യൻ പാർട്ടി സമ്മേളനത്തിൽ പോയി മലയാളം കവിതയും അവതരിപ്പിച്ച് കുർത്തായൊക്കെ ഇട്ട് തിരിച്ചു വന്നത് അയാൾ ഓർത്തു പോയി!) വൈദ്യരുടെ മുഖ്യവരുമാനം പരാതികൾ എഴുതുന്നതിൽ നിന്നു കിട്ടുന്ന ചെറിയ തുകകളായിരുന്നു. പോലീസ് സ്റ്റേഷനടുത്തായിരുന്നതിനാൽ മിക്കവാറും പരാതിക്കാർ വൈദ്യരെക്കൊണ്ടായിരുന്നു എഴുതിക്കുക. കൂടാതെ തൊട്ടടുത്തുള്ള ബാങ്കുകളിലെ ലോണപേക്ഷകളും മറ്റും പൂരിപ്പിക്കുക അത്യാവശ്യം ചില വീടുകളിലെ മൃഗചികിത്സ പിന്നെ മുറുക്കാൻ കടയിൽ നിന്നു കിട്ടുന്ന തുച്ഛമായ വരുമാനം എന്നിവയൊക്കെയായി വൈദ്യർ ഒരു വിധം തട്ടിമുട്ടി കഴിഞ്ഞ് പോകുമായിരുന്നു!

വൈദ്യരുടെ പരാതി എഴുത്തുകൾ നിരഞ്ജന്റെ നാട്ടിൽ മാത്രമല്ല പല ദേശങ്ങളിൽ തന്നെ ചർച്ചാവിഷയമായവയായിരുന്നു! നാട്ടിലെ ചിട്ടിക്കാരൻ പങ്കജാക്ഷനു വൈദ്യരെഴുതിക്കൊടുത്ത പരാതി ലോകപ്രസിദ്ധവുമാണ്. പങ്കജാക്ഷൻ പതിവു സന്ധ്യാമദ്യപാനവും കഴിഞ്ഞ് വീട്ടിലേക്ക് പോകുന്ന വഴിക്ക് ആരോ പണം തട്ടിപ്പറിച്ച സംഭവം വൈദ്യർ പരാതിയാക്കിയതിപ്രകാരമായിരുന്നു:-
വട്ടപ്പറമ്പിൽ പപ്പനാവൻ മകൻ പങ്കജാക്ഷൻ എന്ന ഞാൻ, സർക്കാരിന്റെ ഉടമസ്ഥതയിലുള്ള വിദേശമദ്യശാലയിൽ നിന്നും ‘നിന്ന് മദ്യപിച്ച്‘ മദോന്മത്താനായി, പഞ്ചായത്തിന്റെ അതിർത്തിയിലുള്ള തേക്കിൻ തോട്ടത്തിലൂടെ, കുന്നിൻ‌ചരിവിലുള്ള എന്റെ വീട്ടിലേക്ക് സന്ധ്യാസമയത്ത് മന്ദം മന്ദം ഗമിക്കുമ്പോൾ, കണ്ടാലറിയാവുന്നവരും എന്നാൽ നേരിൽ പരിചയമില്ലാത്തതുമായ ഏതാനം കാപാലികന്മാർ എന്നെ കടന്നു പിടിക്കുകയും അടിക്കുകയും ഇടിക്കുകയും തൊഴിക്കുകയും മർദ്ദിക്കുകയും, അലഭ്യം പറയുകയും പുലഭ്യം പുലമ്പുകയും ശകാരവർഷം ചൊരിയുകയും ചെയ്തു! ഇതൊക്കെ ചെയ്യുമ്പോഴും “അരുതേ! അരുതേ! സോദരന്മാരേ!” എന്നു വിലപിക്കാൻ മാത്രമേ എനിക്കായുള്ളൂ! അതിനു ശേഷം ആ കിങ്കരന്മാർ എന്റെ കയ്യിലുണ്ടായിരുന്ന ആയിരം രൂപയും അതിനോടടുത്ത ചില്ലറയും തട്ടിയെടുത്ത് കടന്നു കളയുകയാണുണ്ടായത്. അയ്യോ! അയ്യോ! എന്ന് ആർത്തനാദം പുറപ്പെടുവിച്ച് , എന്റെ മസ്തകത്തിൽ സ്വകരങ്ങളാൽ താഢനങ്ങളുമേൽ‌പ്പിച്ച് ഞാൻ നിലത്തിരുന്നു പോയി!.....
ഇത്രയും വായിച്ചപ്പോൾ തന്നെ കിങ്ങ്കോങ്ങിന്റെ രൂപവും കുയിലിന്റെ ഇളം ശബ്ദവുമുള്ള (കാട്ടാളൻ എന്ന അപരനാമഥേയത്തിൽ കുപ്രസിദ്ധനായ) ഗൌരവക്കാരൻ എസ് ഐ.മർക്കോസ് ചിരിച്ചുപോയി. പൊട്ടിവന്ന ചിരി നാക്കു കൊണ്ട് ഒന്ന് നനച്ച് വിഴുങ്ങിയതിനു ശേഷം ഗൌരവം നടിച്ച് കുയിൽനാദത്തിൽ പങ്കജാക്ഷനോട് ചോദ്യമുതിർത്തു;
“എന്തോന്നാടാ ചെറ്റേ ഈ എഴുതി വച്ചിരിക്കുന്നത്? ആയിരം രൂഭായും അതിനോടടുത്ത ചില്ലറയും! ഹ്ഹ്ഹും! നീയെന്താടാ എരപ്പേ, ചാക്കിനാത്തായിരുന്നോ ചില്ലറ കൊണ്ടുപോയത്? @#$%^&*()്!!” പങ്കജാക്ഷൻ തിരികെ വന്ന് വൈദ്യരെ മുതലും പലിശയും ചേർത്ത് ചീത്തവിളിച്ചു സമാധാനിച്ചുവത്രെ!

കോഴ്സ് കഴിഞ്ഞ് നാട്ടിലെത്തിക്കഴിഞ്ഞപ്പോൾ വൈദ്യരുടെ കടയുടെ മുൻപിലായിരുന്നു നിരഞ്ജനും നാട്ടിൻപുറത്തെ മറ്റു സുഹൃത്തുക്കളും വൈകുന്നേരങ്ങളിൽ ഒത്തു കൂടിയിരുന്നത്. എവിടെ പോയാലും മദ്യപാനസദസ്സുകളിൽ നിന്നു അൽ‌പ്പം മദ്യം ഒരു കുപ്പിയിൽ വൈദ്യർക്കായി ആരെങ്കിലും എടുക്കുമായിരുന്നു! വൈദ്യരുടെ കടയുടെ മുൻപിൽ ബൈക്കുകൾ നിർത്തി ഇറങ്ങുമ്പോൾ തന്നെ
“ഗരുഡൻ തന്നുടെ ചുണ്ടിനെ വെല്ലും
വൈദ്യർ തന്നുടെ മൂക്കു വിടർത്തി”
ഓരോരുത്തരുടേയും അടുത്തു വന്ന് മണത്തു നോക്കും. എന്നിട്ട് “നിങ്ങളെല്ലാം നന്നായി അകത്താക്കിയിട്ടുണ്ട് അല്ലേ ചുള്ളന്മാരേ? എട് എട്! കുപ്പി എട്! ഞാനൊന്നു താദാത്മ്യം പ്രാപിക്കട്ടെ!” എന്നു പറഞ്ഞ് കുപ്പി തട്ടിപ്പറിച്ച് വായിലേക്ക് കമഴ്ത്തുമായിരുന്നു!

കൂട്ടത്തിലെ സജീവാംഗമായ ചോലയ്ക്കൽ തോമസ്സിന്റെ കല്യാണത്തിനാണു വൈദ്യരുടെ മംഗളപത്രരചനാവൈഭവം ആദ്യമായി നിരഞ്ജൻ കാണാനിടയായത്. ഒത്തുകല്യാണം കഴിഞ്ഞതു മുതൽ എങ്ങനെ വൈദ്യരേക്കൊണ്ട് ഒരു മംഗളപത്രമെഴുതിച്ച് വായിപ്പിക്കും എന്നതായിരുന്നു കൂട്ടുകാരുടെയെല്ലാം കൂലങ്കഷമായ ഡിസ്കഷൻ. തോമസ്സ് അതിനു അമ്പിനും വില്ലിനും അടുക്കുന്നുണ്ടായിരുന്നില്ല. (വൈദ്യർ നാട്ടുകാരുടെ മുൻപിൽ ഒരു തമാശ കഥാപാത്രമായിരുന്നതായിരിക്കാം കാരണം. പോരാത്തതിനു വൈദ്യർ തോമസ്സിനോട് പലതവണ കയ്‌വായ്പയായി പൈസ മേടിച്ചിരുന്നു. ഒരു തവണ 300 രൂപാ പലതവണ ചോദിച്ചിട്ടും അതിനു മുൻപ് കൊടുത്ത പൈസാ തിരിച്ചു കിട്ടാ‍ത്തതിനാൽ തോമസ്സ് “അടുത്തദിവസം തരാം, ഇപ്പോൾ കയ്യിലില്ല!” എന്നിങ്ങനെ ഓരോ ഒഴിവു കഴിവുകൾ പറഞ്ഞിരുന്നു. വാറ്റുചാരായം നിലതെറ്റിച്ച ഒരു ഉച്ചനേരം വൈദ്യർ ഒരു പോസ്റ്റ് കാർഡെടുത്ത് “പ്രിയ മിത്രം തോമ്മാസ്സ് അറിയുന്നതിനു, താങ്കൾ തരാമെന്ന് വാഗ്ദാനം ചെയ്ത തുക ഇതു വരെ എനിക്ക് കരഗതമായിട്ടില്ല എന്ന വിവരം വ്യസനസമേതം അറിയിക്കട്ടെ! അതിനേക്കുറിച്ചാലോചിക്കുമ്പോളൂള്ള എന്റെ വിഷമം താങ്കൾക്ക് മനസ്സിലാകുമല്ലോ? ആയതിനാൽ താങ്കളുടെ താൽ‌പ്പര്യം ഈ വിഷയത്തിൽ പൂർവ്വധികം ശക്തിയിൽ ചെലുത്തി വാഗ്ദത്ത തുക എത്തിച്ചുതരണമെന്ന് താൽ‌പ്പര്യപ്പെടുന്നു! ഒരുത്തനു ഉപയോഗം ഉണ്ടാവുന്ന സമയത്ത് കടം കൊടൂത്തുസഹായിക്കാനുള്ള മനസ്ഥിതിയില്ലെങ്കിൽ പിന്നെ പണം കയ്യിലുണ്ടെന്നു പറഞ്ഞിട്ട് എന്താഹേ കാര്യം?! എന്ന് എഴുതി പോസ്റ്റു ചെയ്തു! ആ കാർഡ് പോസ്റ്റ്മാൻ കൊടുത്തത് തോമസ്സിന്റെ അമ്മ മേരിച്ചേടത്തിയുടെ കയ്യിലായിരുന്നു! അഭിമാനിയായ അവർ ഉടൻ തന്നെ ഒരു പണിക്കാരന്റെ കയ്യിൽ 500 രൂപാ വൈദ്യനു കൊടുത്തുവിട്ടു! തോമസ്സിനു അത് ഭയങ്കര വിഷമുണ്ടാക്കി! അതിന്റെ ഒരു ദേഷ്യവും വൈദ്യരോട് മനസ്സിലുണ്ടായിരുന്നിരിക്കണം!).

കല്യാണത്തലേന്ന് രാത്രി, പന്തലിൽ സദ്യക്കുള്ള ഒരുക്കങ്ങൾ എല്ലാം കഴിഞ്ഞ് പയ്യന്മാർ ഗുണ്ട്. സപ്പോർട്ട്, ലേലം, കീച്ച്, ഫ്ലാഷ്, ബാങ്ക്, പന്നിമലർത്ത് എന്നീ ചീട്ടുകളികളിൽ(എന്തിന് കിലുക്കിക്കുത്ത് വരെ ഉണ്ടായിരുന്നു) മുഴുകിയിരുന്നപ്പോൾ നിരഞ്ജനും സുഹൃത്തുക്കളും വൈദ്യർക്ക് സമയാസമയം കുപ്പിയിൽ നിന്ന് ഊറ്റിക്കൊടുത്ത് മംഗളപത്രമെഴുതിക്കുകയായിരുന്നു!

ഏതായാലും കല്യാണം കഴിഞ്ഞ് വധുവും വരനും മധുരം വയ്പ്പ് നടത്തിക്കഴിഞ്ഞപ്പോഴേയ്ക്കും വൈദ്യരുടെ ഒരു ഫാനായ തോമസ്സിന്റെ അളിയൻ സ്റ്റേജിൽ കയറി അനൌൺസ് ചെയ്തു “അടുത്തതായി മംഗളപത്ര പാരായണം! എഴുതി അവതരിപ്പിക്കുന്നത് വൈദ്യരത്നം ഡേവിസ് കെ. ജോർജ്ജ്!” പറഞ്ഞുതീർന്നതും തോമസ് സിംഹാസനത്തിലിരുന്ന് കണ്ണുരുട്ടി തല കൊണ്ട് അരുത് അരുത്! എന്ന് ആംഗ്യം കാട്ടാൻ തുടങ്ങി. നിരഞ്ജനും കൂട്ടുകാരും “ഞാനൊന്നുമറിഞ്ഞില്ലേ രാമനാരായണാ!“ എന്ന മട്ടിൽ ഐ കോണ്ടാക്റ്റ് കൊടുക്കാതെ നിന്നു!

വൈദ്യർ തന്റെ തോട്ടിപോലത്തെ കാലുകൾ ഒടിച്ച്പൊക്കി വേദിയിൽ കയറി, മേൽമുണ്ടൊന്നു കുടഞ്ഞ് വീണ്ടും തോളിലിട്ട്, മൈക്രോഫോണിനെ ഒന്ന് ഇളക്കി പ്രതിഷ്ഠിച്ച്, മൂരി മുക്രയിടുന്നതു പോലെ മുരടനക്കി. അതിനു ശേഷം പോക്കറ്റിൽ മടക്കി സൂക്ഷിച്ചിരുന്ന ആ മംഗളപത്രം എടുത്ത് പാരായണം തുടങ്ങി...!

“കണ്ണാൽ കണ്ടിടുന്നല്ലോ മംഗലം
വിണ്ണവർ ചേരും സദ്മുഹൂർത്തം
*ഷാന്റീ തോമസ്സുദമ്പതിമാരിവർ
ചാലേ ചേരുന്ന പൊന്മുഹൂർത്തം!
*ചോലയ്ക്കൽ വന്നു *കൊടുങ്കല്ലേൽ നിന്നും
ആലോലമാടട്ടെ ദമ്പതിമാർ!
*മേരിക്കുട്ടിക്കിന്ന് ജന്മം സഫലമായ്
ഷാന്റിമോൾ ആശകൾ പൂവിരിക്കും
.................................................
.................................................
* ഷാന്റി-മണവാട്ടിയുടെ പേർ
*ചോലയ്ക്കൽ-മണവാളന്റെ വീട്ടുപേർ
*കൊടുങ്കല്ലേൽ-മണവാട്ടിയുടെ വീട്ടുപേർ
*മേരിക്കുട്ടി-ജോസഫിന്റെ അമ്മ.

അങ്ങിനെ തുടങ്ങി ഒരു അരമണിക്കൂർ നീളുന്ന കവിത! കവിതയ്ക്കിടയിൽ തനിക്കേറ്റവും കൂടുതൽ മദ്യമൊഴിച്ചു തന്നവരുടെ പേര് കൂടുതൽ തവണ ആവർത്തിക്കാനും വൈദ്യർ മറന്നില്ല! (കല്യാണച്ചടങ്ങ് കഴിഞ്ഞ ഉടനേതന്നെ തോമസ്സ് ഇറങ്ങിവന്ന് നിരഞ്ജനും കൂട്ടുകാർക്കും ഒരു കുട്ടകംനിറയെ തെറി സമ്മാനം നൽകി, വൈദ്യർക്കും കിട്ടി കുറേ!).

ഊത്ത, തവളപിടുത്ത (ജൂൺ/ജൂലൈ) സീസണിലാണ് നിരഞ്ജന്റെയും കൂട്ടുകാരുടേയും സപ്പർ സർക്കീട്ട് സംഘം ആക്റ്റീവായിരുന്നത്! രാത്രിഭക്ഷണം ഒരു വിധം കഴിച്ചു എന്നു വരുത്തി, “ഊത്തപിടിക്കാൻ പോകുന്നു...” എന്ന് പറഞ്ഞ് വീട്ടിൽ നിന്ന് എല്ലാവനും റ്റോർച്ചും വലയും ഒക്കെയായി ബൈക്കിൽ പുറപ്പെടും. വൈദ്യർ നേരത്തേ തന്നെ വാറ്റു ചാരായം വാങ്ങി കരുതിയിരിക്കും. പിന്നെ മുറുക്കാൻ കടയിൽ നിന്ന് നാരങ്ങായും ഉപ്പും പച്ചമുളകും സോഡായുമൊക്കെ ചേർത്ത് നിരഞ്ജൻ കൂട്ടുകാരെല്ലാം ചേർന്ന് വാറ്റ് അകത്താക്കും. ബാക്കി സാധനം കന്നാസിൽ എടുത്ത് മറ്റ് അനുസാരികളുമായി പിന്നീട് പുഴവക്കിലോ തോട്ടിറമ്പിലോ പാടത്തിന്റെ കരയിലോ വച്ചുള്ള മത്സ്യബന്ധന ഇടവേളകൾ ആനന്ദദായകമാക്കാൻ ഉപയോഗിക്കുമായിരുന്നു! മേമ്പൊടിയായി ചിലർക്ക് നീലച്ചടയനും!

അങ്ങനെയുള്ള ഇടവേളകളിലായിരുന്നു നിരഞ്ജനും കൂട്ടുകാരും വൈദ്യരോടൊപ്പം ആഘോഷിച്ചിരുന്നത്! തവളപിടുത്തത്തിലും മീൻപിടുത്തതിലും നായാട്ടിലുമെല്ലാം ഇടത്താവളമായിരുന്നത് കൂട്ടത്തിലൊരാളുടെ ആൾതാമസമില്ലാത്ത ഫാം ഹൌസായിരുന്നു. (പാം ഹൌസ് എന്നു പറയുന്നതായിരിക്കും ആപ്റ്റ്! പുഴ്യ്ക്കും പാടത്തിനും നടുവിലായി ഓലമേഞ്ഞ, ഒരു അടുക്കള അറ്റാച്ച്ഡ് വൺ റൂം കുടിൽ! ഒരു മണ്ണെണ്ണ സ്റ്റൌവും കുറച്ച് മസാലപ്പൊടികളും ഒരു മൺകലവും അഞ്ചാറു പാചകത്തിനുള്ള പാത്രങ്ങളും കുറച്ച് പ്ലേറ്റും ഗ്ലാസ്സുകളും മാത്രമുള്ള ഒരു ഇടത്താവളം. നിരഞ്ജനും കൂട്ടുകാരും കുക്കിങ്ങിൽ പ്രാവീണ്യം നേടിയത് അവിടെ വച്ചുണ്ടാക്കിയ തവളക്കാൽ റോസ്റ്റ്, മീൻപൊരിച്ചത്, കാട്ടുമുയൽ വറുത്തത് എന്നിവയിലൂടെയാണ്! )

സ്വന്തം കവിതകൾ കൂടാതെ കുറത്തിയും പൂതപ്പാട്ടും രാവണപുത്രിയും നാറാണത്തുഭ്രാന്തനുമെല്ലാം വൈദ്യരവതരിപ്പിച്ചിരുന്നു. കൂടാതെ മറ്റുള്ളവരുടെ നേതൃത്വത്തിൽ അരങ്ങേറിയിരുന്ന തെറിപ്പട്ട്, ചൊറിച്ചുമല്ലൽ, ഓട്ടന്തുള്ളൽ എന്നിവയിലും നല്ല വൈദ്യരുടെ സജീവസഹകരണമുണ്ടായിരുന്നു. എന്തിനു‘കവാഡ് ഓഫ് ദ കൌണ്ടിയും’ ‘ബോൺ ഇൻ ദ യൂ എസ് ഏയും’ ‘ബഫലോ സോൾജറും‘ ‘ഹോട്ടൽ കാലിഫോർണിയായും‘ ‘കണ്ട്രിറോഡ്സ് റ്റേക്ക് മി ഹോം’ ഉം ‘വാമും’ ‘ഡയർ സ്റ്റ്രേയ്റ്റ്സും’ ഒക്കെ പിള്ളേർ വച്ചലക്കുമ്പോൾ അർത്ഥമൊന്നുമറിയാതെ ചുമ്മാ കൂടെ ചാടിത്തുള്ളാനും സഹൃദയനായ വൈദ്യർ മുൻപന്തിയിൽ തന്നെ ഉണ്ടായിരുന്നു! മഴക്കാലത്ത് പിടിച്ചുകൊണ്ടു വന്ന തവളകളെ പാം ഹൌസിലെ കിണറ്റിൻ കരയിൽ മരക്കുറ്റിയിൽ പിങ്കാലുകൾ ചേർത്ത് പിടിച്ച് വച്ച് ഒറ്റവെട്ടിനു കാലുകൾ മുറിച്ചെടുക്കുന്ന ദയനീയരംഗം ഒറ്റത്തവണയേ വൈദ്യർ നോക്കിയിട്ടുള്ളൂ! അത് കണ്ട അന്നത്തെ സുരപാനത്തിനു ശേഷം വൈദ്യർ തവളക്കാൽ കടിച്ചുപറിച്ചുകൊണ്ട്, ഹൃദയവേദനയോടെ ഇങ്ങനെ തന്റെ വിലാപകാവ്യം പാടി അവതരിപ്പിച്ചു:-

“കാലുകൾ പോയോരു തവളേ നിന്നെ നിൻ-
കാൽ കഴിക്കുമ്പോളാരോർത്തിടുന്നു ഹാ!”
(ചെലപ്പോൾ...തുടരും...)

വീണ്ടും മഞ്ഞ്!

2009-12-20T10:33:00.000-08:00

മഞ്ഞ് കാരണമുള്ള കഷ്ടപ്പാടിനേക്കുറിച്ച് പണ്ടൊന്നെഴുതിയിരുന്നു. അമേരിക്കയില്‍ ഒഫീഷ്യലായി തിങ്കളഴ്ചയാണ് വിന്റന്‍ തുടങ്ങുന്നതെങ്കിലും കര്‍ട്ടന്‍ റെയ്സറായി ഇന്നലെയും ഇന്നുമായി വീണ മഞ്ഞ് തകര്‍പ്പനായിരുന്നു. ഏതാണ്ട് രണ്ടടിയോളം! മഞ്ഞുമാറ്റി നടുവൊടിഞ്ഞ് വന്നിരുന്ന്, ചൂടുചായയും കുടിച്ച് കൊണ്ട്, കുറച്ച് ചിത്രങ്ങള്‍ ഇടാമെന്നു കരുതി.

സ്നോമാനെ ഉണ്ടാക്കിക്കഴിഞ്ഞപ്പോള്‍ ഡാകിനി ലുക്ക്

വെയിലുകൊള്ളുന്ന സ്നോമാന്‍

മഞ്ഞ്

എന്റെ വാനിന്റ്റെ കോലം!

ഇതൊരു റോഡായിരുന്നു!

അണ്ണാന്‍ കുഞ്ഞും തന്നാലായത്!

പുത്രന്റെ സൈക്കിള്‍

വീണ്ടും പഴയ റോഡ്

മഞ്ഞ് ഉണങ്ങിയ ഇലകളോട് ചെയ്യുന്നത്

ബാക്ക് യാര്‍ഡ്

കോപ്പന്‍ഹേഗന്‍ സ്പെഷ്യല്‍ ഗ്രീന്‍ സ്നോമാന്‍ (കണ്ണ് മുന്തിരിങ്ങ, മൂക്ക് കാരറ്റ്, വായ് പയര്‍, ബട്ടന്‍സ് പ്ളം, മഫ്ലര്‍ പേപ്പര്‍)

മഞ്ഞുമാന്റെ ഫ്രെന്‍ഡ് വ്യൂ

മഞ്ഞേ പോ!!!

ഇവിടെയുമുണ്ട് കുറച്ച് ചിത്രങ്ങള്‍

ട്രിക്ക് ഓര്‍ ട്രീറ്റ്?

2009-10-31T17:23:00.000-07:00

അമേരിക്കയില്‍ നമ്മുടെ കാശ് പോകുന്ന പലവഴികളില്‍ ഒന്നാണിവിടുത്തെ ഹാലോവീന്‍ ആഘോഷങ്ങള്‍. ഒക്റ്റോബര്‍ പിറക്കുന്നതോടെ വീടുകളുടെ മുന്‍പില്‍ ഹാലോവീന്‍ രൂപങ്ങള്‍ വച്ച് അലങ്കാരം (?) തുടങ്ങും. പ്രേതപിശാചുകളും അസ്ഥികൂടങ്ങളും തലയില്ലാത്ത രൂപങ്ങളും വാവലും കാക്കയും എട്ടുകാലിയും ഉള്‍പ്പെടെ പലവിധ ഭീകരര്‍ വീടുകളുടെ മുന്‍പില്‍ നിരക്കും. മത്തന്‍ (പംകിന്‍) ആണ് മറ്റൊരു സൂപ്പര്‍സ്റ്റാര്‍. പലവലിപ്പത്തിലുള്ള, ഓറഞ്ച് കളറിലുള്ള, ഒറിജിനലും കാറ്റുനിറച്ചതും പ്ലാസ്റ്റര്‍ ഓഫ് പാരീസിലുണ്ടാക്കിയതും ഒക്കെയുള്ള മത്തങ്ങാകളാണ് ഏറ്റവും കൂടുതല്‍ ഉപയോഗിക്കുന്നത്. ഇവിടുത്തുകാരില്‍ ചിലര്‍ ഈ വക സാധനങ്ങള്‍ക്ക് കാശ് ചിലവാക്കുന്നതു കണ്ടാല്‍ കണ്ണ്തള്ളി നമ്മള്‍ ഭീകരജീവിയെപ്പോലെയാകും!

ഒക്ടോബറില്‍ ആളുകളെല്ലാം കുട്ടികള്‍ക്കായി ഹാലോവീന്‍ കോസ്റ്റ്യൂം വാങ്ങും. മിക്കവാറും സ്ട്രിപ് മാളുകളിലും താല്‍ക്കാലികമായി കടകള്‍ ഹാലോവീന്‍ വേഷവിധാ‍നങ്ങള്‍ വില്‍ക്കാനായി തുടങ്ങും. സൂപ്പര്‍മാര്‍ക്കറ്റുകളുടെ കാര്യം പറയുകയും വേണ്ട. എല്ലാം ഹാലോവീന്‍ മയം!

ഹാലോവീന്‍ഡേ (ഒക്റ്റോബര്‍ 31)യ്ക്ക് സ്കൂളുകളില്‍ കുട്ടികള്‍ ഭീകരവേഷങ്ങള്‍ ധരിച്ച് (കാര്‍ട്ടൂണ്‍ കഥാപാത്രങ്ങളുടെ വേഷവും മറ്റും ധരിക്കാറുമുണ്ട്) പരേഡും ഹാലോവീന്‍ ഡേ പാര്‍ട്ടിയും നടത്താറുണ്ട്. ചില സ്കൂളുകളില്‍ അന്നു വൈകുന്നേരം മാതാപിതാക്കന്മാര്‍ ഹാലോവീന്‍ രൂപങ്ങളെല്ലാം വണ്ടിയില്‍ പ്രദര്‍ശിപ്പിച്ച് പ്രൊസെഷന്‍ നടത്താറുമുണ്ട്.

സ്കൂള്‍ വിട്ടുകഴിഞ്ഞാല്‍ കുട്ടികളെല്ലാം വേഷഭൂഷാദികളുമായി ട്രിക്ക് ഓര്‍ ട്രീറ്റിന് ഇറങ്ങും. ചുറ്റുവട്ടത്തുള്ള വീടുകളില്‍ പോയി മുട്ടിവിളിച്ച് “ട്രിക്ക് ഓര്‍ ട്രീറ്റ്?” എന്ന് ചോദിക്കും. ട്രീറ്റ് എന്നു പറഞ്ഞ് മിക്കവീട്ടുകാരും കാന്‍‌ഡി നല്‍കും. അങ്ങനെ മിഠായികള്‍ വാങ്ങി സഞ്ചി നിറയ്ക്കുക എന്നതാണ് പരിപാടി.ട്രിക്ക് എന്ന് വീട്ടുകാര്‍ പറഞ്ഞാല്‍ കുട്ടികള്‍ എന്തെങ്കിലും വികൃതികള്‍/കുസൃതികള്‍/ട്രിക്കുകള്‍ കാട്ടണം എന്നാണത്രെ! (പക്ഷെ ഇപ്പോളാരുമങ്ങനെ ട്രിക്ക് പറയാറില്ല.) ഞങ്ങളുടെ അയല്‍ക്കാരെല്ലാം ഇത്തവണ, റിസഷനായിട്ട് പോലും, ഹാലോവീന് കാര്യമായ പ്രകടനമായിരുന്നു. ഡെക്കറേഷന്റെ കാര്യത്തീലും ട്രിക്ക് ഓര്‍ ട്രീറ്റിന്റെ കാര്യത്തിലും! മാതാപിതാക്കന്മാര്‍ വരെ ഇത്തവണ വിലയേറിയ ഹാലോവീന്‍ കോസ്റ്റ്യൂമിലായിരുന്നു!

തികച്ചും സമാധാനപരമായിരിക്കും ഞങ്ങളുടെ പ്രദേശത്ത് ട്രിക്ക് ഓര്‍ ട്രീറ്റ്. അമേരിക്കയുടെ ചിലഭാഗങ്ങളില്‍ ചുരുക്കം ചില കുട്ടികളുടെ ഗാങ്ങുകള്‍ മോശമായി പെരുമാറുന്നതായും റിപ്പോര്‍ട്ടുണ്ടായിരുന്നു. എവിടെയോ ട്രീക് ഓര്‍ ട്രീറ്റിന് വന്ന കുട്ടികളുടെ നേരെ വീട്ടുകാരന്‍ വെടിവച്ച സംഭവവും കഴിഞ്ഞവര്‍ഷം വായിച്ചിരുന്നു. ഏതായാലും ഞങ്ങളുടെ ഡെവലപ്മെന്റില്‍ ടൌണ്‍ഷിപ് പോലീസ്,ജീപ്പുപേക്ഷിച്ച്, സൈക്കളില്‍ ചുറ്റിനടന്ന് നിരീക്ഷിക്കുന്നുണ്ടായിരുന്നു.

പുത്രനേയും പുത്രിയേയും കൂട്ടി, അയല്പക്കത്തെ കുട്ടികളുമൊത്ത് ഞാനും പോയിരുന്നു ട്രിക്ക് ഓര്‍ ട്രീറ്റിന്. രണ്ടുമൂന്നു മണിക്കൂര്‍ ചുറ്റിനടന്ന് കുറെ കാന്‍ഡിയുമായി തിരിച്ചെത്തി.

ഹാലോവീന്‍, ട്രിക് ഓര്‍ ട്രീറ്റ് ദൃശ്യങ്ങള്‍ നിങ്ങള്‍ക്കയിതാ.

അയല്‍ക്കാഴ്ച

റെയ്ചല്‍ സ്പൈഡര്‍ കോസ്റ്റ്യൂമില്‍

പോലീസ് ഓഫീസര്‍ സൈക്കളില്‍

അയല്‍ക്കാരി റെയ്ചല്‍ പംകിനു മുന്‍പില്‍

പുത്രന്‍ കാന്‍ഡി സഞ്ചിയിലാക്കുന്നു

ട്രീക്ക് ഓര്‍ ട്രീറ്റ്?

കാന്‍ഡിയുമായി മടക്കം

അസ്ഥികൂടം ‘പാമ്പായി’ കിടക്കുന്നു.

വേറൊരു പൂമുഖം

ഇവറ്റകളുടെ പേരു മറന്നു

ഹാലോവീന്‍ പരേഡില്‍ നിന്നും

പുത്രിയുടെ പ്ലേസ്കൂളില്‍ നിന്ന്

ഹാലോവീന്‍ കാര്‍ ഡെക്കറേഷന്‍

തൊടിയിലെ കാഴ്ചകള്‍

2009-08-31T09:44:00.000-07:00

ഇത്തവണത്തെ അവധിക്കാലത്ത് വീടിനുചുറ്റും കണ്ട കുറെ കാഴ്ചകള്‍ ക്യാമറായിലാക്കി. അവയില്‍ ചിലത് നിങ്ങള്‍ക്കായി പങ്കുവയ്ക്കുന്നു.

ഒരു കാര്യം മനസ്സിലായി. സ്ഥിരമായി കാണുന്ന പല പൂക്കളുടെയും ചെടികളുടെയും പേര്‍ എനിക്കറിയില്ല എന്ന്! (അറിയാവുന്നവര്‍ ഫോട്ടോയുടെ നമ്പര്‍ സഹിതം കമന്റ്റ്റായിട്ടാല്‍ പോസ്റ്റ് എഡിറ്റ് ചെയ്ത് പേരുകളെല്ലാം പൂര്‍ത്തിയാക്കാമായിരുന്നു!)

1. മംഗൊസ്റ്റീന്‍

2. ജാതി
(എല്ലാ വെക്കേഷനും വീട്ടില്ലെത്തിയാല്‍ ആദ്യം ചെയ്യുന്നത് ജാതിക്കാ പറിച്ച് ഉപ്പും മുളകും കൂട്ടിത്തിന്നുക എന്നതാണ്!)

3. ഇലുമ്പിപ്പൂവ്

4. ഇലുമ്പിപ്പുളി

5. പപ്പായ

6. ചെറുനാരകം

7. ഒടിച്ചുകുത്തി നാരകം.

(ഈ പേരെങ്ങിനെ വന്നു എന്നറിയില്ല! എങ്കിലും ഇവനും ഉപ്പും മുളകും ചേര്‍ത്ത് തിന്നാന്‍ അത്യുഗ്രനാണ്!)

8. ബോള്‍സം

9. ചെത്തി

10. കുരുമുളക്

11. അത്തിപ്പഴം

12. അത്തിമരം

13. വാടാമല്ലി

14. ഇടന (ഏടന)

15. ??

16. കോറല്‍ ക്രീപ്പര്‍

17. കരിവേപ്പ്

18. മുരിങ്ങ

19. കാന്താരിമുളക്

20. ചെമ്പരത്തി

21. ചെത്തി

22. കൊങ്ങിണി

23. പാത്തുമ്മയുടെ ആട്

24. പാഷന്‍ ഫ്രൂട്ട്

25. പാഷന്‍ ഫ്രൂട്ട് (ക്ലോസ് അപ്)

26.വയല്‍പ്പൂവ്

27. നീലാബരി/കാക്കപ്പൂവ്

28.?

29. പാവയ്ക്ക

30.?

31.കല്യാണസൌഗന്ധികം

32. ചെന്തെങ്ങിന്‍ കുല

33. പാളയംകോടന്‍ വാഴക്കുല

34. വീണ്ടപ്പൂ

35. പതിമുഖം (?)

36.വാഴച്ചുണ്ട്

37. കൊങ്ങിണിപ്പൂവ്

38.?

39.നന്ദ്യാര്‍വട്ടം

40. ഉണ്ടമുളക്

41. മത്തപ്പൂവ്

42. ഏത്തവാഴക്കുല

43. ???

44. കല്യാണസൌഗന്ധികം

45. അരളി/അലറി

07/09/09
സെബുവിന്റെയും പ്രിയയുടെയും ബിന്ദുവിന്റെയും മേരിക്കുട്ടിയുടേയും കമന്റുകള്‍ വഴി കിട്ടിയ പേരുകള്‍ ചേര്‍ത്ത് പോസ്റ്റ് എഡിറ്റു ചെയ്തിട്ടുണ്ട്.

സ്വര്‍ഗ്ഗസ്ഥനാം പിതാവേ...!

2009-03-29T04:53:00.000-07:00

പുത്രനെ ഏതു സ്കൂളില്‍ ചേര്‍ക്കണമെന്ന് ഞങ്ങള്‍ മാതാപിതാക്കന്മാരുടെ ഇടയില്‍ ഒരു തര്‍ക്കം നിലനിന്നിരുന്നു. സര്‍ക്കാര്‍ വിദ്യാലയ ഉല്‍പ്പന്നമായ ഞാന്‍ “എവിടെ പഠിച്ചാലും പഠിക്കേണ്ടവര്‍‍ പഠിക്കും; അതാണെന്റ്റെ അനുഭവം!” എന്നു പറഞ്ഞ് വാദിച്ചപ്പോള്‍ മറുഭാഗം (പ്രൈവറ്റ് സ്കൂള്‍ ഉല്പന്നം) താന്‍ പഠിച്ച അടുക്കും ചിട്ടയും, ഡിസിപ്ലിന്‍, ദൈവഭക്തി ഒക്കെ കത്തോലിക്കാ പള്ളിക്കൂടത്തില്‍ നിന്ന് കിട്ടിയതാണ് (ഇതൊക്കെ ഇപ്പോള്‍ എവിടെ പോയൊ?) എന്ന് പറഞ്ഞ് ഘോരഘോരം എതിര്‍ വാദങ്ങള്‍ നിരത്തി!

ഏതായാലും പുത്രനെ നാലു വയസ്സായപ്പോള്‍ അടുത്തുള്ള കത്തോലിക്കാ പള്ളിയോടനുബന്ധിച്ച് നടത്തുന്ന സ്കൂളിലെ കിന്റര്‍ഗാര്‍ടനില്‍ കൊണ്ട്പോയി ചേര്‍ത്തു. അതുവരെ മലയാളം മാത്രം പറഞ്ഞിരുന്ന പുത്രന്‍ ആദ്യമാദ്യം പന്തം കണ്ടപെരുച്ചാഴിയെപ്പോലെ ആയിരുന്നു! (ഞങ്ങള്‍ വീട്ടില്‍ മലയാളം മാത്രമേ സംസാരിക്കൂ എന്ന നിര്‍ബന്ധമുണ്ടായിരുന്നതു കൊണ്ട്!) കൂടെ മലയാളം പറയാന്‍ മരുന്നിനു പോലും ഒരാളില്ല. എന്തിന് ഒറ്റ ഇന്ഡ്യന്‍ പോലുമില്ല ക്ലാസ്സില്‍!

മെല്ലെ മെല്ലെ അത്യാവശ്യം ഇംഗ്ലീഷ് പറയാന്‍ പുത്രന്‍ പഠിച്ചെടുത്തു. പക്ഷെ കൂടെയുള്ള സായിപ്പുകുട്ടികളുടെ ഇംഗ്ലീഷിനൊപ്പം പിടിച്ച് നില്‍ക്കാന്‍ നന്നെ ബുദ്ധിമുട്ടിയിരുന്നു.
അങ്ങനെ ഒരു ദിവസം പുത്തറ് ഉറങ്ങുന്നതിന് മുന്‍പ്‍ സ്കൂളില്‍ നിന്നു പഠിച്ച ഒരു പ്രാര്‍ത്ഥന ചൊല്ലുന്നത് കേട്ടു.
"Our Father, who art in heaven
Hallowed be thy Name,
Thy kingdom come,
Thy will be done,
On earth as it is in heaven.
Give us this day our daily bread......"
എന്നത്.

(മലയാളത്തില്‍ ഏകദേശം ഇങ്ങനെ;
“സ്വര്‍ഗ്ഗസ്ഥനായ ഞങ്ങളുടെ പിതാവേ,
അങ്ങയുടെ നാമം പൂജിതമാകണമേ
അങ്ങയുടെ രാജ്യം വരേണമേ,
അങ്ങയുടെ തിരുമനസ്സ് സ്വര്‍ഗത്തിലേപ്പോലെ ഭൂമിയിലുമാകേണമേ,
അന്നന്ന് വേണ്ട ആഹാരം ഇന്ന് ഞങ്ങള്‍ക്ക് നല്‍കേണമേ......” )

(“സ്വര്‍‌ഗ്ഗസ്ഥനാം പിതാവേ”യും “ഹരിവരാസനവും” ബാങ്കുവിളിയും സ്ഥിരം കേട്ട്, അമ്പലത്തിനും പള്ളിക്കും മോസ്കിനും നടുക്കു കിടന്ന്, എസ്. എസ്. എല്‍. സി പരീക്ഷക്കാലത്ത് ഒന്നു ഒച്ച കുറയ്ക്കാമോ എന്ന് ചോദിച്ചതിന് നാട്ടുകാരായ ഭക്തരുടെ “കണ്ണിലുണ്ണിയായ” കുടുംബത്തില്‍ നിന്നു വന്നതിനാല്‍ “സ്വര്‍ഗ്ഗസ്ഥനായ പിതാവെ” (ഔര്‍ ഫാദറിന്റെ മലയാളം) എനിക്ക് കാണാപ്പാഠമായിരുന്നു.)
എന്നും രാത്രി കിടക്കുന്നതിനു മുന്‍പ് കക്ഷി ഈ പ്രാര്‍ത്ഥന ചൊല്ലിത്തുടങ്ങി. അങ്ങനെയെങ്കിലും കുറച്ച് ഇംഗ്ലീഷ് പഠിച്ച് പിടിച്ച് നില്‍ക്കട്ടെ അവന്‍ എന്ന് ഞങ്ങളും കരുതി.

അങ്ങനെ ഒരാഴ്ച കഴിഞ്ഞു. ഒരു സുപ്രഭാതത്തില്‍ കിടക്കപ്പായില്‍ നിന്നും രാവിലെ എഴുന്നേറ്റ് കണ്ണും തിരുമ്മി കിച്ചനില് ബ്രേക് ഫാസ്റ്റ് റ്റേബിളില്‍ വന്ന അവന്‍ പറഞ്ഞു
“എനിക്കെന്നും ബ്രെഡ് വേണ്ട!”.

“ഇന്നു മുട്ട പുഴുങ്ങിയതും ഏത്തപ്പഴവുമാണ്. മുട്ടയല്ലെ നിനക്ക് ഏറ്റവും ഇഷ്ടം?”
എന്ന്, അതൊരു സാദാ പരിഭവമായിക്കരുതി, ഞാന്‍ ചോദിച്ചു.

ഒരു മൂളലോ‍ടെ കക്ഷി തന്റെ പ്രിയ വിഭവമായ മുട്ടയും ചായയും കഴിച്ച് സ്കൂളില്‍ പോകാനൊരുങ്ങി.

അന്നു രാത്രി അവന്റെ പ്രാര്‍ത്ഥന ഇങ്ങനെ കേട്ടു;
“Our Father, who art in heaven,
Thy kingdom will come,
Thy will be done,
On earth as it is in heaven.
Give us this day our daily EGG...."

"എടെടാ... എന്തായിത്?എന്തിനാ മാറ്റിപ്പറഞ്ഞെ?”
എന്നു ഞാന്‍.

“എനിക്ക് ബ്രെഡ് ഇഷ്ടമില്ല! എന്നും അതു കഴിക്കാന്‍ എനിക്കു വേണ്ട.
എനിക്കെന്നും മുട്ട കിട്ടിയാല്‍ മതി!”
എന്ന മറുപടി ഉടന്‍ വന്നു!

ഹൌ!! എന്തൊരു മഞ്ഞ്..! (കുറച്ച് മഞ്ഞു ചിത്രങ്ങള്‍)

2009-02-05T04:47:00.001-08:00

ഗ്ലോബല്‍ വാമിങ്ങ് എന്ന പ്രതിഭാസം മനുഷ്യരാല്‍ ഉണ്ടാകുന്നതല്ല എന്നും സൂര്യനില്‍ നിന്നുള്ള ഭൂമിയുടെ അകലം (ചുറ്റിത്തിരിയലിനിടയില്‍) കുറഞ്ഞും കൂടിയും വരുന്നതിനാലാണെന്നു കഴിഞ്ഞദിവസം ഒരു ചേട്ടായി റ്റിവിയില്‍ വന്നു പറയുന്നതു കേട്ടായിരുന്നു. ഇനിയിപ്പോള്‍ കുറച്ചുനാളുകള്‍ അകലം കൂടിയിരിക്കുന്നതിനാല്‍ ഗ്ലോബല്‍ കൂളിങ്ങായിരിക്കുമത്രേ! അതില്‍ വിശ്വാസമൊന്നുമില്ലെങ്കിലും കഴിഞ്ഞ വര്‍ഷത്തെ അപേക്ഷിച്ചു ഈ വര്‍ഷം മഞ്ഞ് പെയ്ത ദിവസങ്ങള്‍ അനവധി. ഗ്ലോബല്‍ കൂളിങ്ങ് വരട്ടെ ഉത്തര ധ്രുവത്തിലെ ധ്രുവക്കരടിക്കുട്ടന്മാര്‍ക്ക് ഓടിച്ചാടിക്കളിക്കാന്‍ ഒത്തിരി ഒത്തിരി മഞ്ഞുമലകള്‍ ഉണ്ടാവട്ടെ എന്നൊക്കെ, സാറാ പാളിനോടൊട്ടും താല്‍പ്പര്യമില്ലാത്ത, ഞാന്‍ ആഗ്രഹിക്കുന്നുണ്ടെങ്കിലും കഴിഞ്ഞ മാസങ്ങളില്‍ നടത്തിയ മഞ്ഞ് മാറ്റലിനു ശേഷം മിനിയാന്നും മൂന്നുതവണ ഷവല്‍ ചെയ്യേണ്ടി വന്നപ്പോള്‍ എന്റെ ക്ഷമയുടെ നെല്ലിപ്പലക തകര്‍ന്നു.

“മഞ്ഞേ വാ.. ” എന്ന് പണ്ട് പാടി നടന്നതും എം. ടി യുടെ മഞ്ഞ് വായിച്ചിഷ്ടപ്പെട്ടതും ഡോക്ടര്‍ ഴിവാഗൊ സിനിമയിലെ മഞ്ഞ് (മെഴുകാണെന്നറിയാതെ) കണ്ട് കൊതിച്ചതുമൊക്കെ മറന്നിട്ടല്ല ഇതെഴുതുന്നത്. പടങ്ങളില്‍ കാണാന്‍ നല്ല രസവും എന്നല്‍ നേരിട്ടനുഭവിക്കുന്നവരുടെ പരിപ്പിളക്കുകയും ചെയ്യുന്ന ഒരു പ്രതിഭാസമാണീ മഞ്ഞ് പെയ്യല്‍!

ഏതായാലും ഈ കൊടും തണുപ്പുകാരണം ഹീറ്റിങ്ങ് ഗ്യാസ് ബില്‍ കഴിഞ്ഞ വിന്ററിലേതിന്റെ ഇരട്ടി. മഞ്ഞ് തള്ളി മാറ്റി ഒടിഞ്ഞ ഷവല്‍ രണ്ടെണ്ണം. ഉപ്പ്, കാറിന്റെ വിന്‍ഡ് ഷീല്‍ഡ് വാഷര്‍ ഫ്ലൂയിഡ്, കാര്‍ വിന്ഡോ ഗ്ലാസ് സ്ക്രേപ്പര്‍ എന്നിവയ്ക്കു ചിലവു വേറെ! മഞ്ഞുഷവലു ചെയ്യുന്നതിന്റെ ബുദ്ധിമുട്ടോര്‍ക്കുമ്പോള്‍ അല്‍പ്പം കാശ് പോയാലും വേണ്ടില്ല ഒരു സ്നോ ബ്ലോവര്‍ വാങ്ങാമെന്നു വിചാരിക്കുമെങ്കിലും ഉള്ളിലെ പിശുക്ക് “അത്രയെങ്കിലും എക്സര്‍സൈസ് കിട്ടട്ടെ” എന്ന ആരോഗ്യചിന്തയായി പരിണമിച്ച് ബ്ലോവറിനെ തള്ളിമാറ്റും.

ഒന്നുരണ്ടിഞ്ചു വരെയുള്ള മഞ്ഞ് എന്റെ വാനിനു പ്രശ്നമല്ലെങ്കിലും അതില്‍ കൂടിയാല്‍ പിന്നെ നാട്ടുമ്പുറത്തെ ഷാപ്പില്‍ നിന്നും അന്തിവിസിറ്റും കഴിഞ്ഞ് പോകുന്നവരെപ്പോലെ ഇങ്ങോട്ടു പിടിക്കുമ്പോള്‍ അങ്ങോട്ടുപോകും (ദോഷം പറയരുതല്ലോ വണ്ടി സ്കിഡ് ചെയ്യുമ്പോള്‍ സ്കിഡ് ചെയ്യുന്നു എന്ന് പടം ഡാഷ്ബോര്‍ഡില്‍ കാണിയ്ക്കും-എനിക്കാണെങ്കില്‍ അതു കാണുമ്പോള്‍ നമ്മള്‍ വീഴുന്നതു കാണുമ്പോള്‍ കൈകൊട്ടി ചിരിക്കുന്ന കുട്ടികളെ ഓര്‍മ്മ വരും).

റോഡൊക്കെ റ്റൌണ്‍ഷിപ്പുകാരും വീടിന്റ്റെ ചുറ്റുപാടൊക്കെ ഡെവലപ്മെന്റുകാരും ക്ലീനാക്കി, നന്നായി മഞ്ഞു മാറ്റിത്തരുമെങ്കിലും ഡ്രൈവ് വേ എന്ന വണ്ടി ഗരാജിലേയ്ക്കു കേറ്റുന്ന വഴിയും വാക് വേയും നമ്മളുതന്നെ ക്ലീന്‍ ചെയ്യണം. അമേരിയ്ക്കയില്‍ വന്നെറങ്ങിയപ്പോള്‍ മുതല്‍ ആളുകള്‍ പറഞ്ഞു പേടിപ്പിച്ച് വച്ചിരിയ്ക്കുന്നതാണ് “നമ്മുടെ ഡ്രൈവ് വേയിലോ വാക് വേയിലോ വല്ലവരും വീണാല്‍ അവര്‍ സ്യൂ ചെയ്യും. പിന്നെ കുടുംബം വില്‍ക്കേണ്ടിവരും കാശ് കൊടുക്കാനെന്ന്”. പൈസ ഒത്തിരി ഉണ്ടെങ്കിലും അതിന്റെ അഹങ്കാരമില്ലാത്തതുകൊണ്ടും റിസ്ക് എടുക്കാന്‍ ഒട്ടും താല്‍പ്പര്യമില്ലാത്തതുകൊണ്ടും‍ അല്‍പ്പം കഷ്ടപ്പാടാണേലും മഞ്ഞു മാറ്റിയേക്കാം എന്നു കരുതുന്നത്.

മഞ്ഞുമാറ്റിയ റോഡ്

പിന്നെ നിങ്ങളുടെ അയല്പക്കത്ത് അല്‍പ്പം പ്രായമുള്ള വല്യപ്പനും വല്യമ്മയും കൂടെയാണെങ്കില്‍ കൂനിന്മേല്‍ കുരു എന്നു പറഞ്ഞതു പോലെ അവരുടെ മഞ്ഞുമാറ്റല്‍ കൂടെ നമ്മുടെ തലയിലാകും. സാരമില്ല ഈ ലോലമനസ്സുകാരുടെ ഓരോ ബുദ്ധിമുട്ടുകളേ!

രണ്ടുമൂന്നു ലേയര്‍ ഡ്രെസ്സിടീയ്ക്കാതെ പിള്ളേരെയും വെളിയിലിറക്കാന്‍ പറ്റില്ല. സ്വെറ്റര്‍, ജായ്ക്കറ്റ്, ക്യാപ്, ഗ്ലൌസ് തുടങ്ങി അനുസാരികള്‍ വേറേ. അതിനിടയിലായിരിയ്ക്കും പിള്ളേര്‍ക്ക് സ്നൊമാന്‍, ഇഗ്ലൂ, സ്നൊ സ്ലൈഡിങ്ങ് തുടങ്ങിയ ഐഡിയകള്‍ വരുന്നത്. കളിയ്ക്കാന്‍ ഇറങ്ങി തിരിച്ചു കേറേണ്ട താമസം തുടങ്ങും മൂക്കു ചീറ്റലും പിഴിച്ചിലും!

ലാണ്ടെ ആ ചേട്ടായി ഉപയോഗിക്കുന്നതാണ് സ്നോ ബ്ലോവര്‍

എങ്ങാനും കുറച്ച് സ്നോ അധികം വീണാല്‍ ഉടന്‍ സ്കൂളുകാര്‍ വിളിച്ച് സ്കൂള്‍ ക്ലോസിങ്ങ്, ഡിലേയ്ഡ് സ്റ്റാര്‍ട്ടിങ്ങ് അല്ലെങ്കില്‍ ഏര്‍ളി ക്ലോസിങ്ങ് എന്നു മെസ്സേജിടും. അപ്പനുമമ്മയും ജോലിചെയ്യുന്ന കുടുംബങ്ങളാണെങ്കില്‍ പിന്നെ ചുറ്റി. ആര്‍ക്കെങ്കിലും ലീവെടുക്കുകയോ താമസിച്ച് ഓഫീസില്‍ പോകുകയോ നേരത്തേ ഓഫീസില്‍ നിന്നിറങ്ങുകയോ ചെയ്യേണ്ടി വരും പിള്ളേരുടെ കൂടെ ഇരിക്കാന്‍. അല്ലെങ്കില്‍ ബേബി സിറ്ററെ അറേഞ്ച് ചെയ്യണം.

ഇതും പോരാണ്ട് വയസ്സും പ്രായവുമേറി വരുന്നു എന്ന നഗ്നസത്യം മുന്നില്‍ വന്നു നിന്നു പല്ലിളിച്ച് കാണിയ്ക്കുന്നതു പോലെ, ഈയിടെയായി തണുപ്പുകാലമാകുമ്പോളേയ്ക്കും സന്ധികള്‍ക്കെല്ലാം നല്ല വേദന. തണുപ്പ് വളരെ ഇഷ്ടപ്പെട്ടിരുന്ന എനിയ്ക്കു തന്നെ മടുത്തു തുടങ്ങിയിരിയ്ക്കുന്നു. പോരാത്തതിനു റ്റെക്സാസിലും, കാലിഫോര്‍ണിയായിലും, ഫ്ലോറിഡായിലുമുള്ള കൂട്ടുകാര്‍ അങ്ങോട്ട് ചെല്ലാന്‍ നിര്‍ബന്ധിയ്ക്കുകയും ചെയ്യുന്നു. നോക്കട്ടെ എന്നു വിചാരിച്ചിരിയ്ക്കുമ്പോളാണ് ലോകത്തേറ്റവും തണുപ്പുള്ള, സ്ഥിരമായി ജനവാസമുള്ള, സ്ഥലമായ ഓയ്മിയകന്‍ എന്ന സൈബീരിയായിലെ പട്ടണത്തേക്കുറിച്ചുള്ള ഈ വീഡിയോ കണ്ടത്. അവരുടെയൊന്നും അനുഭവത്തിന്റെ ഏഴയല്പക്കത്ത് വരില്ലല്ലോ നമ്മുടേത് എന്നോര്‍ത്തപ്പോള്‍ തല്‍ക്കാലം ഇവിടെ തന്നെ തുടരാം എന്നു തീരുമാനിച്ചു!

പിന്നെ ഒബാമ ഭരിച്ച് ഭരിച്ച് ഞങ്ങളുടെ വീടിന്റെയൊക്കെ വിലയൊന്നു കൂടട്ടെ എന്നൊരു ചിന്തയും മനസ്സില്‍ വന്നില്ല എന്നു പറഞ്ഞാല്‍ അസത്യമാകും.

ഓ. ടോ.

കുറച്ചു മഞ്ഞ് ചിത്രങ്ങള്‍ പോസ്റ്റു ചെയ്ത് പോകാം എന്നുകരുതി വന്നതാണ്. പക്ഷേ കത്തി നീണ്ട് പോയി. ചിത്രങ്ങള്‍ കാണുന്നത് കൊള്ളാം പക്ഷേ ഔട് ഓഫ് ഫോക്കസാ, ഡെപ്ത് ഓഫ് ഫീല്‍ഡ് ശരിയായില്ല, അപ്പാടെ നോയിസ്സാ, ടങ്ങ്സ്റ്റണ്‍ വൈറ്റ് ബാലന്‍സാണോ, റെസോല്യൂഷന്‍ ശരിയായില്ല എന്നൊക്കെ പറഞ്ഞാല്‍ അയല്പക്കത്തെ ക്ലാര അമ്മൂമ്മേടെ തോക്കെടുത്തോണ്ട് വന്ന് ഷൂട്ടിടുവേ! ഇതു ഇന്നലെ ഓഫീസില്‍ പോകുന്ന വഴി എന്റെ പോയിന്റ് ആന്‍ഡ് ഷൂട് ക്യാമറയില്‍ ചുമ്മാ എടുത്തത്. ഇത് മഞ്ഞ് കാണാത്തവര്‍ക്കായി സമര്‍പ്പിയ്ക്കുന്നു.

വസന്തവും ഹേമന്തവും ശിശിരവും-ചിത്രങ്ങളില്‍

2009-01-21T17:56:00.000-08:00

ഈയിടെ ഫാരിങ്ങ്ടന്‍ ലെയ്ക്കിന്റെ പരിസരത്ത് കൂടി വീണ്ടും കടന്നു പോകേണ്ട ആവശ്യമുണ്ടായിരുന്നു. വസന്തകാലത്തും ഹേമന്തകാലത്തും അതിലെ പോയപ്പോള്‍ എടുത്ത പടങ്ങള്‍ ബ്ലോഗിലിട്ട കാര്യം ഓര്‍ത്തപ്പോള്‍ അതുവഴി ഒന്നു പോയി മഞ്ഞുകാലത്ത് അവിടം എങ്ങിനെയിരിക്കുന്നു എന്ന് നോക്കിക്കളയാം എന്ന് കരുതി. കഴിഞ്ഞ ദിവസങ്ങളില്‍ ഇവിടെ ഏറ്റവും താഴ്ന്ന താപനില 5 ഡിഗ്രീ ഫാരന്‍ ഹീറ്റ് ( -15 ഡിഗ്രീ സെത്ഷ്യസ് )ആയിരുന്നതിനാല്‍ തടാകത്തിലെ വെള്ളം കട്ടിപിടിച്ചിരുന്നു.

ഫാരിങ്ടന്‍ ലേയ്ക്-വസന്തത്തില്‍

ഫാരിങ്ടന്‍ ലേയ്ക്-ഹേമന്തത്തില്‍

ഫാരിങ്ടന്‍ ലേയ്ക്-ശിശിരത്തില്‍

തടാകത്തിലെ കട്ടിപിടിച്ച വെള്ളത്തിന്‌ മുകളില്‍ കഴിഞ്ഞ ദിവസം വീണ മഞ്ഞും കൂടി ആയപ്പോള്‍ ഏതാണ്ട് വെള്ളപ്പരവതാനി വിരിച്ചതു പോലെയിരുന്നു. ഉറഞ്ഞുകിടക്കുന്ന വെള്ളത്തിന്‌ മുകളിലെ മഞ്ഞിലൂടെ ഒരു പിതാവ് തന്റെ പുത്രനെ ഒരു പ്ലാസ്റ്റിക് പാത്രത്തിന്റെ അടപ്പിലിരുത്തി വലിച്ചുകൊണ്ട് നടക്കുന്നുണ്ടായിരുന്നു! പണ്ട് ചേട്ടന്‍ കമുകിന്‍ പാളയില്‍ എന്നെയിരുത്തി വലിച്ചുകൊണ്ട് നടന്നിരുന്നതോര്‍ത്തു പോയി!

വിര്‍ജീനിയായിലെ നാച്ചുറല്‍ ബ്രിജ്ജിലേക്കൊരു യാത്ര

2009-01-12T09:05:00.000-08:00

ഇത്തവണ കുട്ടികളുടെ ക്രിസ്തുമസ് വെക്കേഷനു എങ്ങോട്ടെങ്കിലും പോകണമെന്നു പ്ലാനിട്ടിരുന്നു. ഈ വര്‍ഷം ന്യൂ ജേഴ്സിയില്‍ തണുപ്പു വളരെ കൂടുതല്‍ ആയതിനാല്‍ ചൂടുള്ള ഏതെങ്കിലും സ്ഥലം വേണമെന്നു പൊതുവെ എല്ലാവരും താല്പര്യപ്പെട്ടിരുന്നു. കഴിഞ്ഞ വര്‍ഷം അവധിക്കാലത്ത് ഫ്ലോറിഡായില്‍ ആയിരുന്നതിനാല്‍ ഇത്തവണ, ചെറിയ തണുപ്പുണ്ടെങ്കിലും, വിര്‍ജിനിയയില്‍ പോയി തങ്ങാം എന്നു തീരുമാനമായി. എവിടെ തങ്ങണമെന്നോ എന്തൊക്കെ കാണണമെന്നോ വ്യക്തമായ തീരുമാനമൊന്നുമില്ല്ലാതെ, കുടുംബസമേതം നേരെ വിര്‍ജീനിയായിലെ വില്യംസ്ബര്‍ഗിനു തിരിച്ചു. ഞങ്ങള്‍ താമസിക്കുന്ന സ്ഥലത്തു നിന്നും എതാണ്ട് ആറര മണിക്കൂര്‍ ഡ്രൈവിനു ശേഷം, ഡെലവെയര്‍, മേരിലാന്‍ഡ്, വാഷിങ്ടണ്‍ പ്രദേശങ്ങള്‍ താണ്ടി, രാത്രിയോടെ വില്യംസ് ബര്‍ഗില്‍ എത്തി. അവിടെ കണ്ട ഹോളിഡേ ഇന്നില്‍ മുറിയെടുത്തു.

അമേരിക്കന്‍ ചരിത്രതില്‍ പ്രധാന സ്ഥാനമുള്ള ഒരു സംസ്ഥാനമാണ് വിര്‍ജീനിയ. അമേരിക്കയുടെ ആദ്യ അഞ്ചു പ്രസിഡന്റുമാരില്‍ നാലുപേരും വിര്‍ജീനിയക്കാരായിരുന്നു! വിര്‍ജീനിയായിലെ ഹിസ്റ്റൊറിക് ട്രയാംഗിള്‍ (വില്ല്യംസ് ബര്‍ഗ്, ജെയിംസ് ടൌണ്‍, യോര്‍ക് ടൌണ്‍ എന്നീ സ്ഥലങ്ങള്‍ ചേര്‍ന്ന) വളരെയധികം സഞ്ചാരികളെ ആകര്‍ഷിക്കാറുണ്ട്. അമേരിക്കന്‍ ചരിത്രം അറിയാന്‍ താല്‍പ്പര്യമുള്ളവര്‍ക്ക് ഈ സ്ഥലങ്ങള്‍ വളരെ ഇഷ്ടപ്പെടും. കൂടാതെ ഒരു ഇന്‍ഡോര്‍ വാട്ടര്‍ പാര്‍ക്കും മ്യൂസിയങ്ങളും പലതരം ബ്രാന്‍ഡുകളുടെ ഫാ‍ക്ടറി ഔട്ലെറ്റുകളും (വിലക്കുറവില്‍ സാധനങ്ങള്‍ കിട്ടുന്ന) മറ്റും ഇവിടെയുണ്ട്.

പിറ്റേദിവസം രാവിലെ ബ്രേക്ഫാസ്റ്റ് കഴിഞ്ഞ് ഹോട്ടല്‍ ലോബിയില്‍ നിന്നു കിട്ടിയ വിര്‍ജീനിയ റ്റൂറിസത്തിന്റെ ഒരു ബ്രോഷറില്‍ നിന്നാണ് നാച്ചുറല്‍ ബ്രിജ്ജിനേക്കുറിച്ചു കാണുന്നത്. നെറ്റില്‍ സേര്‍ച്ച് ചെയ്തു കുറെ വിവരങ്ങള്‍ കൂടെ ശേഖരിച്ചു. എന്നാല്‍ അടുത്ത ദിവസം അങ്ങോട്ടു തന്നെ പൊയ്ക്കളയാം എന്നും തീരുമാനമായി. അവിടെ ആകെപ്പാടെയുള്ള ഒരു ഹോട്ടലായ നാച്ചുറല്‍ ബ്രിജ്ജ് ഹോട്ടലില്‍ റൂം ബൂക്ക് ചെയ്തു. രണ്ടു ദിവസം റിലാക്സ് ചെയ്തതിനു ശേഷം (വില്യംസ് ബര്‍ഗില്‍ കാര്യമായി ഒന്നും കണ്ടില്ല, ആകെപ്പാടെ കുറെ മ്യൂസിയങ്ങളും ഔട്ലെറ്റ് സ്റ്റോറുകളും വില്യംസ് ബര്‍ഗ് വൈനറിയും മാത്രം കറങ്ങി!) മൂന്നാം ദിവസം രാവിലെ തന്നെ നാച്ചുറല്‍ ബ്രിജ്ജിലേയ്ക്കു തിരിച്ചു. റൂം ചെക്കൌട്ട് ചെയ്യാന്‍ തുടങ്ങിയപ്പൊള്‍ മുതല്‍ പുത്രന്‍ കരച്ചില്‍ തുടങ്ങി. (അവനാരോ ഹോട്ടല്‍കാര്‍ കൈവിഷം കൊടുത്തതാണെന്നു തോന്നുന്നു, ഹോട്ടല്‍ റൂമില്‍ താമസിക്കുക എന്നാല്‍ കക്ഷിക്കു സ്വര്‍ഗ്ഗം കിട്ടിയതു പോലെയാണ്. റൂം വിടുകയാണ് എന്നു കേള്‍ക്കുമ്പൊള്‍ തന്നെ തുടങ്ങും കരച്ചില്‍. ) പിന്നെ വേറെ ഹോട്ടലിലേയ്ക്കാണു പോകുന്നത് എന്നു പറഞ്ഞ് സമാധാനിച്ച് വണ്ടിയില്‍ കയറ്റി.

വില്യംസ് ബര്‍ഗില്‍ നിന്നും ഏതാണ്ട് 200 മൈല്‍ പടിഞ്ഞാറാണ് നാച്ചുറല്‍ ബ്രിജ്ജ്. ഏതാണ്ട് മൂന്നര മണിക്കൂര്‍ യാത്ര. ഇന്റെര്‍സ്റ്റേറ്റ് ഹൈവേ അറുപത്തിനാല് (I-64) വഴിയാണ് അങ്ങോട്ട് പോയത്. കുറേ ദൂരം പിന്നിട്ടു കഴിഞ്ഞപ്പോള്‍ ഷെനന്‍ഡോവ വാലി, ബ്ലൂ റിജ്ജ് മൌണ്ടന്‍ എന്നൊക്കെയുള്ള ബോര്‍ഡുകള്‍ കണ്ടതോടെ പുത്രന്‍ ആനന്ദതുന്ദിലനായി. അവന്റെ ഏറ്റവും പ്രിയ ഗാനമായ “കണ്ട്രി റോഡ്സ് റ്റേക്ക് മി ഹോമില്‍” ഇവയേക്കുറിച്ചു സൂചിപ്പിക്കുന്നതിനാല്‍! (ജോണ്‍ ഡെന്വറിന്റെ ഈ പാട്ട്-ഞങ്ങളുടെ ഡിഗ്രി പഠനകാലത്തും, അതിനു മുന്‍പും, പിന്‍പും പ്രസിദ്ധമായിരുന്ന-കുറേ നാളുകളായി വീട്ടിലും വണ്ടികളിലും സ്ഥിരം ഓടുന്നു! ഈ പാട്ടല്ലാതെ വേറൊന്നും കേള്‍ക്കാന്‍ കക്ഷി സമ്മതിക്കില്ല! കുറച്ചു നാളായി തന്റെ ലാസ്റ്റ് നെയിം, ജോണ്‍ ഡെന്വര്‍ മാറ്റിയതു പോലെ, “ഡെന്വര്‍” എന്നാക്കാന്‍ പറ്റുമോ എന്നാലോചിച്ച് നടക്കുകയാണു പാര്‍ട്ടി! ഈ ആറു വയസ്സുകാരന്‍ പിയാനോയില്‍ ആദ്യമായി വായിക്കാന്‍ പഠിച്ചതും ഈ പാട്ടു തന്നെ!). പാട്ട് കേട്ടപ്പോള്‍ ഞാന്‍ വിചാരിച്ചിരുന്നത് ബ്ലൂ റിജ്ജ് മൌണ്ടന്‍ വെസ്റ്റ് വിര്‍ജീനിയ സ്റ്റേറ്റിലാണെന്നാണ്. ഒരു ഭാഗം വിര്‍ജീനിയായിലും ഉണ്ടെന്നത് എനിക്ക് പുതിയ അറിവായിരുന്നു.

വളരെ മനോഹരമാണു ഷെനന്‍ഡൊവ വാലിയിലൂടെയുള്ള യാത്ര. അപ്പലേച്യന്‍ പര്‍വത നിരയിലൂടെയുള്ള യാത്ര വിന്റെറായിരുന്നിട്ടും വളരെ നയനമനോഹരമായിരുന്നു. ഐ-64 റോക്ക് ഫിഷ് ഗ്യാപ് എന്ന മലനിരകളിലെ ഉയരം കുറഞ്ഞ സ്ഥലത്തു വച്ച് ബ്ലൂ റിജ്ജ് മലനിര മുറിച്ചുകടക്കുന്നു. ഐ-64 ഇല്‍ നിന്നും വടക്കോട്ട് പോകുന്ന സ്കൈ ലൈന്‍ ഡ്രൈവും തെക്കോട്ടുപോകുന്ന ബ്ലൂ റിജ്ജ് പാര്‍ക്ക് വേയും അമേരിക്കയിലേ തന്നെ ഏറ്റവും നയനാഭിരാമമായ റൂട്ടുകളാണെന്നു പിന്നീടറിഞ്ഞു. “ഫാള്‍ സീസണില്‍” ഇവിടം സന്ദര്‍ശിക്കുന്നതാണു കൂടുതല്‍ നന്നെന്നു അനുഭവസ്ഥര്‍ പറഞ്ഞതിനാല്‍ അടുത്ത ഫാളില്‍ അതിലേ പോകാമെന്നു തീരുമാനിച്ചു. ഐ-64 ഇല്‍ കൂടെ പോകുമ്പോള്‍ പലയിടത്തും വച്ച് അകലെ ബ്ലൂ റിജ്ജ് മൌണ്ടന്‍ കാണാം. പേരു പോലെ തന്നെ നീലകലര്‍ന്ന ഒരു നിറമാണീ പര്‍വതനിരകള്‍ക്ക്. ഈ മലനിരകളില്‍ ഉള്ള പൈന്‍ മരങ്ങള്‍ പുറത്തു വിടുന്ന ഏതോ പ്രത്യേക തരം ഹൈഡ്രൊ കാര്‍ബണാണിതിനു കാരണം എന്നു എവിടെയോ വായിച്ചു. (ഇനിയിപ്പോള്‍ ഏതു ഹൈഡ്രൊ കാര്‍ബണ്‍, പൈന്‍ മരം മാത്രമേ ഹൈഡ്രൊ കാര്‍ബണ്‍ പുറത്തു വിടുകയുള്ളോ എന്നൊക്കെ ചോദിച്ചാല്‍ എനിക്ക് ഒരു ഉത്തരമേയുള്ളൂ “കെമിസ്ട്രിയിലും ബോട്ടണിയിലും മറ്റു വിഷയങ്ങളിലേപോലെ തന്നെ ഞാനൊരു വലിയ വലിയ പൂജ്യമാണ്!” ഗൂഗിളേ ശരണം!!!) ഐ-64 ഇല്‍ നിന്നും ഇടത്തേയ്ക്ക് (സൌത്ത്) തിരിഞ്ഞു ഏതാണ്ട് പതിനഞ്ചു മിനിറ്റ് ഐ-81 എന്ന ഇന്റെര്‍സ്റ്റേറ്റ് ഹൈവേയില്‍ യാത്ര ചെയ്തപ്പോഴേക്കും നാച്ചുറല്‍ ബ്രിജ്ജ് എക്സിറ്റ് കണ്ടു. അവിടെ നിന്നും ഏതാണ്ട് 5 മിനിറ്റ് ഡ്രൈവ് വേണ്ടി വന്നു ഹോട്ടലില്‍ എത്താന്‍. ഈ ബ്രിജ്ജ് സ്ഥിതി ചെയ്യുന്ന സ്ഥലത്തിനും റ്റൌണ്‍ഷിപ്പിനും നാച്ചുറല്‍ ബ്രിജ്ജ് എന്നു തന്നെയാണ് പേര്‍.

അകലെ ബ്ലൂ റിജ്ജ് മൌണ്ടെന്‍

ഇനി ഈ ബ്രിജ്ജ് ഉണ്ടായതിനേപ്പറ്റി അല്പം ചരിത്രം. ചരിത്രാതീത കാലത്ത് ബ്രിജ്ജും പരിസരപ്രദേശങ്ങളും ലൈം സ്റ്റോണും ഡോല്‍മൈറ്റും ഷെയിത്സും കൊണ്ട് രൂപപ്പെട്ട് വെള്ളത്താല്‍ മൂടിക്കിടന്നിരുന്നു. പിന്നീട് ഏതാണ്ട് 200 മില്ല്യണ്‍ വര്‍ഷങ്ങള്‍ക്കു മുന്‍പ്, വെള്ളം കുറഞ്ഞതിനാലായിരിക്കണം, ഇവ വെള്ളത്തിനു മുകളിലായി. അതിനു ശേഷം ഏതാണ്ട് 3 മില്ല്യണ്‍ വര്‍ഷങ്ങള്‍ക്കു മുന്‍പ് ഭൌമാന്തര്‍ഭാഗത്തെ നീരുറവകള്‍ പാറക്കെട്ടുകളിലെ സുഷിരങ്ങളില്‍ കൂടെയും വിടവുകളില്‍ കൂടെയും പാറകളെ കാര്‍ന്നു തിന്നുകൊണ്ട്, ഗുഹകളും മറ്റും ഉണ്ടാക്കിക്കൊണ്ട്, ഒഴുകി. അങ്ങനെ ഒരു ദുര്‍ബ്ബലമായ പാറക്കഷണം ഇടിഞ്ഞു വീണതിനു ശേഷം ബാക്കി വന്നതാണത്രേ നാച്ചുറല്‍ ബ്രിജ്ജും കൊക്കയും മറ്റും! ( സെഡാര്‍ ക്രീക്കെന്നു വിളിയ്ക്കുന്ന ഒരു അരുവി ബ്രിജ്ജിനടിയിലൂടെ ഇപ്പോഴും കടന്നു പോകുന്നു ).

നാച്ചുറല്‍ ബ്രിജ്ജ് ഹോട്ടല്‍

തദ്ദേശവാസികളായിരുന്ന മൊണാക്കന്‍ ഇന്‍ഡ്യന്‍സിന്റെ കയ്യില്‍ നിന്നും, ബ്രിട്ടീഷ് അധിനിവേശത്തെത്തുടര്‍ന്നു, ബ്രിട്ടീഷ് ഉടമസ്ഥതയിലാ‍യി ഇപ്രദേശം. 1750-ല്‍ ജോര്‍ജ് വാഷിങ്ടണ്‍ (പിന്നീട് അമേരിക്കയുടെ ആദ്യ പ്രസിഡന്റായി) ഈ പ്രദേശം സര്‍വ്വേ നടത്തുകയുണ്ടായി. (അക്കാലത്ത് അദ്ദേഹം കൊത്തിവച്ചതാണെന്നു പറയപ്പെടുന്ന G.W ഇനീഷ്യത്സ് ഇപ്പോഴും ബ്രിജ്ജില്‍ കാണാം). 1774 -ല്‍ തോമസ് ജെഫേഴ്സണ്‍ (ഇദ്ദേഹം പിന്നീട്, 1801-1809, മൂന്നാമത്തെ അമേരിക്കന്‍ പ്രസിഡന്റായി) ഇംഗ്ലണ്ടിലെ രാജാവായിരുന്ന ജോര്‍ജ് മൂന്നാമന്റെ കയ്യില്‍ നിന്നും നാച്ചുറല്‍ ബ്രിജ്ജും മറ്റും ഉള്‍പ്പെടുന്ന 157 ഏക്കര്‍ 20 ഷില്ലിംഗിന് ( ഒരു പൌണ്ടിന്) വാങ്ങി. അദ്ദേഹം പണികഴിപ്പിച്ച ഇരട്ടമുറി കാബിന്‍ ഇരുന്ന സ്ഥലത്തു തന്നെയാണീ ഹോട്ടല്‍. 1833-ല്‍ തോമസ് ജെഫേഴ്സന്റെ അനന്തരാവകാശികളില്‍ നിന്നും ഈ സ്ഥലം വാങ്ങിയ ആള്‍ അവിടെ ഫോറെസ്റ്റ് ഇന്‍ എന്ന ഹോട്ടെല്‍ പണികഴിപ്പിച്ചു. 1963-ല്‍ ഒരു തീപിടുത്തത്തില്‍ പൂര്‍ണ്ണമായി കത്തി നശിച്ച ആ ഹോട്ടലിനു പകരമായി പണികഴിപ്പിച്ചത് ആണ് ഇന്നു കാണുന്ന ഹോട്ടല്‍. 1800 കളില്‍ യൂറോപ്പില്‍ നിന്നും ലോകത്തിന്റെ മറ്റു ഭാഗങ്ങളില്‍ നിന്നും ഏറ്റവും കൂടുതല്‍ പേര്‍ അമേരിക്കയില്‍ സന്ദര്‍ശിച്ചിരുന്നത് നയാഗ്രയും നാച്ചുറല്‍ ബ്രിജ്ജുമായിരുന്നത്രേ!

നാച്ചുറല്‍ ബ്രിജ്ജിലെ പ്രഭാതം-ഹോട്ടല്‍ ജന്നലിലൂടെ

അന്‍പതു വര്‍ഷത്തോളം പഴക്കമുണ്ടെങ്കിലും സ്വിമ്മിംഗ് പൂള്‍, ഫിറ്റ്നെസ്സ് സെന്റെര്‍, കോണ്ടിനെന്റല്‍ റെസ്റ്റൊറന്റ്, കോണ്‍ഫെറന്‍സ് ഹാളുകള്‍ എന്നീ സൌകര്യങ്ങളെല്ലാം ഈ ഹോട്ടലിലുണ്ട്. കൂടാതെ റെഡ് റ്റാവേണ്‍ എന്നൊരു നല്ല മദ്യശാലയും കോട്ടേജുകളും നാച്ചുറല്‍ ബ്രിജ്ജിനരികത്തായി ഒരു കാഷ്വല്‍ ഡൈനിംഗ് ഏരിയായും ഉണ്ട്. ബ്രേക്ഫാസ്റ്റും ബ്രിജ്ജ് വിസിറ്റിങ് പാസും ഉള്‍പ്പെടുന്ന സ്വീറ്റ് പക്കേജ് ചാര്‍ജ്ജ് $100 ആയിരുന്നു.

പ്രാതലും കാത്ത്-ഹോട്ടലിലെ റെസ്റ്റൊറന്റ്

കഴിഞ്ഞ രണ്ട് ദിവസവും അമേരിക്കന്‍ ഭക്ഷണം കഴിച്ച് (ബര്‍ഗറും മറ്റും കണ്ടുപിടിച്ചവനെ കിട്ടിയാല്‍ തട്ടിക്കളയും എന്ന അവസ്ഥയിലായിരുന്നു ഞങ്ങള്‍. എന്തിനു ഫ്രെഞ്ച് ഫ്രൈ പ്രാന്തരായ കുട്ടികള്‍ വരെ മടുത്തു കഴിഞ്ഞിരുന്നു!) മടുത്തതിനാല്‍ ഞങ്ങള്‍ ഇന്‍ഡ്യന്‍ അല്ലെങ്കില്‍ ചൈനീസ് റെസ്റ്റൊറന്റ് തപ്പിയിറങ്ങി. ഇന്‍ഡ്യന്‍ റെസ്റ്റൊറണ്ട് ഏതാണ്ട് 45 മിനിറ്റ് ഡ്രൈവുണ്ട് എന്നറിഞ്ഞതിനാലും ചൈനീസ് റെസ്റ്റൊറണ്ട് അടയ്ക്കാറായതിനാലും “റൂബി റ്റ്യൂസ്ഡെയ്” എന്ന ഒരു അമേരിക്കന്‍ ചെയിന്‍ റെസ്റ്റൊറന്റില്‍ ഡിന്നറിനായി ശരണം പ്രാപിച്ചു.

ഹോട്ടലിലെ റെഡ് ബോക്സ് റ്റാവേണ്‍

രാവിലെ എഴുന്നേറ്റ് ബാല്‍ക്കണിയില്‍ നിന്നും സൂര്യോദയം നല്ലൊരു കാഴ്ചയായിരുന്നു. ഓഫ് സീസണായതിനാല്‍ ആള്‍ത്തിരക്കും വണ്ടികളും വളരെ കുറവായിരുന്നു. ഫ്രെഷ് ആയി കോണ്ടിനെന്റല്‍ ബ്രേക്ക്ഫാസ്റ്റിനായി റെസ്റ്റൊറണ്ടില്‍ എത്തി. പല ഹോട്ടലുകളിലും താമസിച്ചിട്ടുണ്ടെങ്കിലും ഇത്രയും നല്ല ബ്രേക്ഫാസ്റ്റ് വളരെ അപൂര്‍വ്വമായി മാത്രമേ കിട്ടാറുള്ളൂ! ഏതാണ്ട് 60 നു മുകളില്‍ പ്രായമുള്ള റോസലീന്‍ എന്ന അമേരിക്കക്കാരിയായിരുന്നു വെയിറ്റ്രസ്. ആയമ്മ തന്റെ ഭര്‍ത്താവ് റിട്ടയര്‍ ആയതിനു ശേഷം നാച്ചുറല്‍ ബ്രിജ്ജിലേയ്ക്കു താമസം മാറ്റിയതാണ്. ഇപ്പോഴും കരടിയും വിര്‍ജീനിയന്‍ വൈപ്പര്‍ എന്ന അണലിപാമ്പും മാനുകളും ഇടയ്ക്ക് വീടു സന്ദര്‍ശിക്കാറുണ്ടെന്നു കേട്ടപ്പോള്‍ അത്ഭുതം തോന്നി.

റെസ്റ്റൊറന്റ്-മറ്റൊരു ദൃശ്യം

സീസണായാല്‍ ഹോട്ടല്‍ നിറയാറുണ്ടെന്നും വളരെ തിരക്കാകാറുണ്ടെന്നും റോസി ചേച്ചി പറഞ്ഞു. പാന്‍ കെയ്ക്ക് എന്ന അമേരിക്കന്‍ ദോശയ്ക്ക് ഇത്ര റ്റേസ്റ്റുണ്ടെന്നു മനസ്സിലായതും ഇവിടെ നിന്നാണ്.

ഹോട്ടല്‍ വരാന്ത

ഭക്ഷണത്തിനു ശേഷം കുറച്ചൂ നേരം ഹോട്ടല്‍ വരാന്തയില്‍ പോയിരുന്നു വെയില്‍ കാഞ്ഞു! ന്യൂ ജേഴ്സിയിലെ 36 ഡിഗ്രീ ഫാരന്‍ഹീറ്റ് (2.22ഡിഗ്രീ സെത്ഷ്യസ്) തണുപ്പില്‍ നിന്നും വന്നതിനാലാവണം വിര്‍ജീനിയായിലെ 65 ഡിഗ്രീ ഫാരന്‍ഹീറ്റില്‍ (18.33 ഡിഗ്രീ സെത്ഷ്യസ്) ബാലസൂര്യന്റെ കിരണങ്ങളേറ്റ് ഇരിക്കാന്‍ നല്ല സുഖമായിരുന്നു!

ബ്രിജ്ജിലേക്കുള്ള പ്രവേശനകവാടവും ഗിഫ്റ്റ് ഷോപ്പും

നല്ല ചൂടുള്ള ദിവസമായിരുന്നതിനാല്‍ ഞങ്ങള്‍ അധികം താമസിയാതെ തന്നെ നാച്ചുറല്‍ബ്രിജ്ജ് കാണാനിറങ്ങി. ഹോട്ടലില്‍ നിന്നും ഏതാണ്ട് 100 മീറ്റര്‍ അകലെയുള്ള ബ്രിജ്ജ് പ്രവേശന കവാട മന്ദിരത്തില്‍‍ ഒരു റ്റോയ് മ്യൂസിയവും ഗിഫ്റ്റ് ഷോപ്പും ഉണ്ട്. മുതിര്‍ന്നവര്‍ക്ക് $12 ഉം കുട്ടികള്‍ക്ക് $6 ഉം ആണ് ബ്രിജ്ജിലേയ്ക്ക് പ്രവേശനനിരക്ക്. ഇവിടെ നിന്നും ബ്രിജ്ജിനടുത്തേയ്ക്കു പോകുവാനായി ഷട്ടില്‍ ബസോ 137പടികളോ ഉപയോഗിക്കാം. നടകളിറങ്ങി എത്തുന്നത് കസ്കേഡ് ക്രീക് പിക്നിക് ഏരിയായിലാണ്. ഇവിടെ അടുത്തായി ഒരു സമ്മര്‍ ഹൌസ് കഫേയും (വിന്റെറായതിനാല്‍ അടച്ചിട്ടിരുന്നു) ഉണ്ട്. മരങ്ങളാല്‍ ചുറ്റപ്പെട്ട ഈ പ്രദേശം വളരെ മനോഹരമാണ്. ഷട്ടില്‍ ബസ് കഫേയുടെ മുന്‍പില്‍ വരെ സര്‍വീസ് നടത്തുന്നു.

ഇതിനടുത്തായിരുന്നു ലോകത്തേറ്റവും പ്രായം കൂടിയ മരം നിന്നിരുന്നത് എന്നു ബ്രോഷറില്‍ കണ്ടിരുന്നു. ആ‍ര്‍ബര്‍ വിറ്റെ (Arbor Vitae) എന്ന ഈ മരം30 വര്‍ഷങ്ങള്‍ കഴിയുമ്പോള്‍ ഒരിഞ്ച് വ്യാസം മാത്രം കൂടുന്നതായിരുന്നത്രേ! 1980-ല്‍ മരിക്കുമ്പോള്‍ ആ മരത്തിനൂ 56 ഇഞ്ച് വ്യാസമുണ്ടായിരുന്നു. അതായത് ഏതാണ്ട് 1680 വയസ്സ്!

നാച്ചുറല്‍ ബ്രിജ്ജ്-സെഡാര്‍ അരുവിയും നടപ്പാതയും

ഇവിടെ നിന്നും ബ്രിജ്ജിലേയ്ക്ക് പോകുമ്പോള്‍ കാസ്കേഡ് ക്രീക്ക് സെഡാര്‍ ക്രീക്കായി മാറുന്നു. സെഡാര്‍ ക്രീക് റ്റ്രെയില്‍ എന്ന നടപ്പാതയും അരുവിയോടൊപ്പം ബ്രിജ്ജിനടിയിലൂടെ കടന്നു പോകുന്നു. (ചിത്രങ്ങള്‍ കാണുക).

നാച്ചുറല്‍ ബ്രിജ്ജ്-ക്യാമെറായിലാക്കുന്ന സഞ്ചാരികള്‍

നാച്ചുറല്‍ ബ്രിജ്ജിനു നടപ്പാതയുടെ നിരപ്പില്‍ നിന്നും ഏതാണ്ട് 215 അടി ഉയരമുണ്ട്. രണ്ട് കര((?)കളേയും തമ്മില്‍ ചേര്‍ക്കുന്ന സ്പാനിനു 90 അടിയോളം നീളവും പാലത്തിനു 40 മുതല്‍ 70 അടി വരെ വീതിയുമുണ്ട്! ലീ ഹൈവേ എന്ന (2 വരി) സ്റ്റേറ്റ്ഹൈവേ 11 (US-11) ഈ പാലത്തിനു മുകളിലൂടെ കടന്നു പോകുന്നു എന്നറിയുമ്പോള്‍ ഈ പാലത്തിന്റെ ബലം നിങ്ങള്‍ക്കൂഹിക്കാന്‍ പറ്റും. ഫോട്ടോയില്‍ റോഡിലെ ബോര്‍ഡ് ചെറുതായി കാണാം. റോഡിനിരുവശവും സുരക്ഷയ്ക്കായി ബോര്‍ഡ് കൊണ്ട് മറച്ചിരിക്കുന്നു. ( ഞങ്ങള്‍ തിരിച്ചു പോരും വഴി കാറില്‍ ബ്രിജ്ജിനു മുകളിലൂടെ കടന്നു പോകുമ്പോള്‍ ശ്രദ്ധിച്ചിരുന്നു. തിരിച്ചറിയാന്‍ പ്രയാസം!)

ആളൊഴിഞ്ഞ ബ്രിജ്ജ്

പാലത്തിനുള്ളില്‍ വച്ച് അരുവി ഗതി മാറുന്നതിനാല്‍ പാലം കഴിഞ്ഞ് നടപ്പാത അരുവിയുടെ ഇടതു വശത്തേയ്ക്ക് മാറുന്നതിനാല്‍ അവിടെ അരുവി കുറുകേ കടക്കാന്‍ ഒരു ചെറിയ പാലമുണ്ട്.
ഇരുവശവുമുള്ള പാറക്കെട്ടുകളില്‍ പലരും പേരുകള്‍ കൊത്തിവച്ചിരിക്കുന്നതു കാണാം. 1850-ല്‍ ഇവിടം സര്‍വ്വേ ചെയ്ത ജോര്‍ജ്ജ് വാഷിങ്ടണ്‍ കൊത്തിവച്ചതാണെന്ന് പറയപ്പെടുന്ന G.W അക്ഷരങ്ങള്‍ (ഇതിന് ആ‍ധികാരികമായ സാക്ഷ്യം ഒന്നുമില്ല്ല പോലും!) ഇപ്പോഴും കാണാം.

ബ്രിജ്ജ്-ഒരു ലാന്‍ഡ്സ്കേപ്പ് ഫോട്ടൊ കൂടി

തിരക്ക് വളരെ കുറവായിരുന്നതിനാല്‍ റ്റ്രെയിലിലൂടെയുള്ള യാത്ര വളരെ രസകരമായിരുന്നു. ഞങ്ങളേക്കൂടാതെ വേറെ ഒന്ന് രണ്ട് ഫാമിലി മാത്രമേ ഉണ്ടായിരുന്നുള്ളൂ. അരുവിയുടെ കളകളാരവവും പക്ഷികളുടെ സംഗീതവും ആസ്വദിച്ച് വന്മരങ്ങളുടെ നിഴലിലൂടെ ആ ഇളം തണുപ്പിലുള്ള യാത്ര രസകരമായിരുന്നു! പലതരം പക്ഷികളും ചിത്രശലഭങ്ങളും അണ്ണാന്‍, റക്കൂണ്‍, ഒപ്പൊസം, മുയല്‍ തുടങ്ങിയ ജന്തുക്കളും ഇവിടെ സുലഭമാണത്രേ!(പക്ഷെ തണുപ്പായാല്‍ കാണാന്‍ ബുദ്ധിമുട്ടാണ്.)

ജോര്‍ജ്ജ് വാഷിങ്ടണ്‍ സ്വയം കൊത്തിയെന്നു പറയപ്പെടുന്ന ഇനിഷ്യത്സ്

കുറച്ചുകൂടി മുന്നോട്ടു പോയാല്‍ ഇവിടെ താമസിച്ചിരുന്ന ആ‍ദിവാസികളായിരുന്ന മൊണോക്കന്‍ ഇന്‍ഡ്യന്‍സിന്റെ കുടിലുകളുടെ പുനരാവിഷ്ക്കാരം കാണാം. (ഇവയും വിന്ററായതിനാല്‍ പുതുക്കിപ്പണിയിലായിരുന്നു.) സീസണില്‍ ഇവിടെ ആദിവാസ വേഷധാരികളായ മോഡലുകളേയും റെഡ് ഇന്‍ഡ്യന്‍ ജീവിതരീതിയുടെ പുനരാവിഷ്കാരവും കാണാം. 1928 മുതല്‍ ലൈറ്റ് ആന്‍ഡ് സൌണ്ട് ഷോയും ബ്രിജ്ജില്‍ നടത്തുന്നുണ്ട് ( സീസണില്‍ മാത്രം).

പുത്രന്‍-പാലത്തിനടിയിലെ പാലത്തില്‍

അവിടെ നിന്നും ഏതാണ്ട് ഇരുനൂറടി പോയാല്‍ സോള്‍ട്ട് പെറ്റെര്‍ ഗുഹാകവാടം കാണാം. 1812-ലെ യുദ്ധത്തിലും അമേരിക്കന്‍ സിവില്‍ വാറിലും ഈ ഗുഹയില്‍ നിന്നും പക്ഷി-വാവല്‍ കാഷ്ഠങ്ങള്‍ നിറഞ്ഞ മണ്ണ് വറ്റിച്ച് അതില്‍ നിന്നും പൊട്ടാസ്യം നൈറ്റ്രേറ്റ് വേര്‍തിരിച്ച് വെടിമരുന്നായി ഉപയോഗിച്ചിരുന്നു! മണ്ണ് കലക്കിയ വെള്ളം തിളപ്പിച്ച് വറ്റിച്ചാണിതുണ്ടാക്കിയിരുന്നത്.

ബ്രിജ്ജ്-മറുവശത്തു നിന്നുമുള്ള ദൃശ്യം

6 വയസ്സുകാരനും 3 വയസ്സുകാരിയും ഇത്രയുമായപ്പോളേയ്ക്കും ഏതാണ്ട് തളര്‍ന്ന് കഴിഞ്ഞിരുന്നു. ആദ്യമായായിരിക്കും അവര്‍ ഇത്രയും ദൂരം നടക്കുന്നത്. ആകാശം ഇരുണ്ട് മൂടി. ചാറ്റല്‍ മഴയും തുടങ്ങി. ഏതാണ്ട് ഒരു മൈല്‍ കൂടി പോയാല്‍ ലെയ്സ് ഫാള്‍ എന്ന വെള്ളച്ചാട്ടം കാണാമായിരുന്നു. അവിടെയാണ് ട്രെയില്‍ അവസാനിക്കുന്നത്. മഴ കാരണം വെള്ളച്ചാട്ടം കാണാതെ തിരിച്ച് ഷട്ടില്‍ ബസ്സ് പാര്‍ക്കിങ്ങില്‍ എത്തി ബസില്‍ ഹോട്ടലിലേയ്ക്ക് മടങ്ങി.

ബ്രിജ്ജ്-മറുവശത്തു നിന്നും വീണ്ടും

ലഞ്ചിന് ശേഷം മഴ ശമിച്ചപ്പോള്‍ വീണ്ടും പുറത്തിറങ്ങി. ഇത്തവണ വാക്സ് മ്യു‌സിയം സന്ദര്‍ശിച്ചു. വാക്സ് മ്യൂസിയത്തോടനുബന്ധിച്ചു തന്നെ ഒരു വാക്സ് പ്രതിമാ നിര്‍മ്മാണശാലയും പ്രവര്‍ത്തിക്കുന്നുണ്ട്. ഇവിടെ ഉണ്ടാക്കുന്ന മെഴുക് പ്രതിമകള്‍ ലോകത്തിന്റെ പല ഭാഗങ്ങളിലും ഉള്ള മ്യു‌സിയങ്ങളിലും മറ്റും പ്രദര്‍ശിപ്പിച്ചിട്ടുണ്ട്. മെഴുക് പ്രതിമാ നിര്‍മ്മാണത്തിന്റെ പല ഘട്ടങ്ങള്‍ ഇവിടെ ഫാക്ടറി ടൂറില്‍ കണ്ട് മനസ്സിലാക്കവുന്നതാണ്.

സെഡാര്‍ ക്രീക്ക് (അരുവി)

അതിന് ശേഷം തൊട്ടടുത്ത്‌ തന്നെയുള്ള ടോയ് മ്യു‌സിയം സന്ദര്‍ശിച്ചു. 1740 മുതല്‍ 2000 വരെയുള്ള 45000-ത്തില്‍ പരം കളിപ്പാട്ടങ്ങളും പാവകളും ഇവിടെ ശേഖരിച്ചിട്ടുണ്ട്. കുട്ടികള്‍ക്ക് വളരെ ഇഷ്ടപ്പെടും എന്ന് വിചാരിച്ച് പോയ ഈ സ്ഥലം ഞങ്ങളെയെല്ലാവരെയും വളരെ നിരാശപ്പെടുത്തി. കളിപ്പാട്ടങ്ങളെല്ലാം, ഒരു വിവരണവുമില്ലാതെ, റാക്കില്‍ വച്ചിരുന്നതിനാല്‍ ഒരു കളിപ്പട്ടക്കടയില്‍ പോയ പ്രതീതി മാത്രം നല്കി. ആളൊന്നിന് പത്തു ഡോളര്‍ പോയത് മിച്ചം!

നടപ്പാതയും (TRAIL) അരുവിയും (ഇവ നാച്ചുറല്‍ ബ്രിജ്ജിനടിയിലൂടെ കടന്നു പോകുന്നു)

വേറെ പല ആകര്‍ഷകങ്ങളായ സ്ഥലങ്ങളും ആ ചുറ്റുവട്ടത്ത് തന്നെ ഉണ്ടായിരുന്നു. ഒരു സൂവും വൈല്‍ഡ് സഫാരിയും ഹോന്റെഡ് ഹൌസും മറ്റും. പക്ഷെ ഓഫ് സീസണായതിനാല്‍ അവയെല്ല്ലാം അടച്ചിരുന്നു. പിന്നെയുള്ള ഒരു സ്ഥലം ഇംഗ്ലണ്ടിലെ സ്റ്റോണ്‍ ഹെഞ്ചിന്റെ പുനരാവിഷ്കാരമായ ഫോം ഹെഞ്ച് ആയിരുന്നു. തിരിച്ച് പോകേണ്ട സമയം അതിക്രമിച്ചിരുന്നതിനാല്‍ അവിടവും സന്ദര്‍ശിക്കാന്‍ പറ്റിയില്ല.

സോള്‍ട് പെറ്റര്‍ ഗുഹ (SALT PETER CAVE)

34 നില വരെ ആഴമുള്ള ഗുഹകളും (സീസണില്‍ മാത്രം സന്ദര്‍ശകര്‍ക്കായി തുറക്കുന്നത്) ഇവിടെ അടുത്തുണ്ട്. ഇവിടെ നിന്നും അര മണിക്കൂര്‍ ദൂരത്തിലുള്ള റോനോകെ എന്ന സ്ഥലം വളരെയധികം മ്യുസിയങ്ങളുള്ള സ്ഥലമാണ്.

വാക്സ് മ്യൂസിയവും ഫാക്റ്ററിയും

മുന്വിധിയും കണക്കു കൂട്ടലുകളും ഒന്നുമില്ലാതെ പോയതു കൊണ്ടായിരിക്കണം, ഇത്രയും സ്ഥലങ്ങള്‍ ഓഫ് സീസണായതിനാല്‍ അടച്ചിട്ടിരുന്നിട്ടും, ഈ ട്രിപ്പ്‌ ഞങ്ങള്‍ വളരെ ആസ്വദിച്ചത്. ഒരു ഗെറ്റ് എവേ മാത്രമെ ഞങ്ങള്‍ ഉദ്ദേശിച്ചിരുന്നുള്ളൂ!

വാക്സ് മ്യൂസിയത്തില്‍ കണ്ട കുതിരക്കാരനും കുതിരയും

പോകാന്‍ താല്‍പ്പര്യമുള്ളവര്‍ സീസണില്‍ പോകുക. സ്പ്രിങ്ങും ഫാളുമായിരിക്കും ഏറ്റവും നല്ലത്. അധികം പ്രതീക്ഷിച്ചു കൊണ്ട് പോയാല്‍ ചിലപ്പോള്‍ നിരാശയായിരിക്കും ഫലം. ഞങ്ങള്‍ക്ക് ഇഷ്ടപ്പെട്ടതിനാല്‍ എല്ലാവര്‍ക്കും ഇഷ്ടപ്പെടണമെന്നില്ല എന്ന് തുടങ്ങിയ മുന്‍കൂര്‍ ജാമ്യങ്ങള്‍ ഞാനിപ്പോഴേ എടുത്തിരിക്കുന്നു.

അമേരിക്കന്‍ പോസ്റ്റുമാന്‍-വാക്സ് മ്യൂസിയത്തില്‍ നിന്നും

ഒരു കാര്യം കൂടി ഓര്‍ത്തിരിക്കുന്നത് നന്നായിരിക്കും. കുഴിയാനയെ കൊമ്പനാനയാക്കുന്നതില്‍ അതി സമര്‍ത്ഥരാണ് അമേരിക്കന്‍ ടുറിസം വകുപ്പുകാര്‍. പലതും നമ്മുടെ നാട്ടിലെ ഓരോന്നുമായി താരതമ്യപ്പെടുത്തുമ്പോള്‍ ഒന്നുമായിരിക്കില്ല. പക്ഷെ അതെല്ലാം അവതരിപ്പിച്ചു നമ്മുടെ കാശ് പിഴിഞ്ഞെടുക്കുന്ന രീതി ഒന്നു കാണേണ്ടത് തന്നെയാണ്!

ബ്ലോഗില്‍ വേറെ നാച്ചുറല്‍ ബ്രിജ്ജ് ഇവിടെയും ഇവിടെയും കാണാം!

വിവരങ്ങള്‍ക്ക് കടപ്പാട്: പല ബ്രോഷറുകള്‍, വെബ് സൈറ്റുകള്‍, നാച്ചുറല്‍ ബ്രിജ്ജ് ഹോട്ടല്‍ സ്റ്റാഫ്, വിര്‍ജീനിയ ടൂറിസം ഡിപ്പാര്‍ട്മെന്റ്

അനോണി ആന്റണിക്കൊരു ക്രിസ്മസ് ടര്‍ക്കി

2008-12-25T04:06:00.000-08:00

(ഈ പോസ്റ്റ് വായിക്കുന്നതിനു മുന്‍പ് കോവാലകൃഷ്ണന്‍ പറയുന്നതു പോലെ ഇതും, ഇതും കൂടി വായിക്കുക)

അമേരിക്കയില്‍ വന്നതിനു ശേഷം ഭക്ഷണം കഴിക്കുമ്പോള്‍ സ്ഥിരം മുന്നില്‍ വരുന്ന ഒരു വാക്കാണ്‌ ടര്‍ക്കി. സ്മോക്ഡ് ടര്‍ക്കി ആയും ടര്‍ക്കി സാന്റ്റ്വിച്ചായും താങ്സ് ഗിവിങ്ങിനു ഗ്രില്ല് ചെയ്തും മറ്റും ധാരാളം ടര്‍ക്കി അമേരിക്കയില്‍ വന്നതിനു ശേഷം അകത്താക്കിയിട്ടുണ്ട്‌. എന്നിരുന്നാലും മരുന്നിനു പോലും ഒരു ടര്‍ക്കി ഇവിടെ കണ്ടിട്ടില്ല. ഈ ടര്‍ക്കി എല്ലാം എവിടെയായിരിക്കും എന്ന് പല തവണ ആലോചിച്ചിട്ടുമുണ്ട്!

അങ്ങനെ കഴിഞ്ഞു കൂടുമ്പോളാണ് ഒരു ദിവസം ഹരീഷ് തൊടുപുഴയുടെ ഒരു പോസ്റ്റില്‍ കപ്പയും മത്തി (ചാള) വറുത്തതും കാണുന്നത്. എന്നാല്‍ ഇന്നു മത്തി കഴിച്ചിട്ട് തന്നെ കാര്യം എന്ന് കരുതി രാവിലെ തന്നെ പിള്ളേരെയും പെറുക്കി വാനിലിട്ടു പുറത്തിറങ്ങി. ലോക്കല്‍ മാര്‍ക്കറ്റ് എന്സൈക്ലോപീഡിയ റിപ്പോര്‍ട്ട് ചെയ്തു 5 മൈല്‍ അകലെയുള്ള ഒരു ചൈനീസ് സൂപ്പര്‍ മാര്‍ക്കറ്റില്‍ ഫ്രെഷ് മത്തി അവൈലബിള്‍ എന്ന്. $1.99/പൌണ്ട്. (ഫ്രോസേന്‍ മത്തി കഴിച്ചു, ഇഷ്ടപ്പെടാതെ, മടുത്തത് കൊണ്ടു തല്ക്കാലം മത്തി കഴിക്കുന്നത് നിര്‍ത്തി വച്ചിരിക്കുകയായിരുന്നു!)

പുല്‍ത്തകിടിയില്‍ വിശ്രമിക്കുന്നവര്‍

അങ്ങനെ ആ കൊടും തണുപ്പുള്ള പുലര്‍കാലത്ത്‌ എന്റെ വാന്‍ ചൈനീസ് സൂപ്പെര്‍മാര്ക്കറ്റ് നോക്കി കുതിച്ചു. കുട്ടികള്‍ പുറകിലിരുന്നു WALL-E കാര്‍ട്ടൂണ്‍ DVD കണ്ടു കൊണ്ടിരുന്നു. വാല്‍-ഇ യുടെ ഞരക്കവും മൂളലും കൊണ്ടു വണ്ടി മുഖരിതം! അപ്പോള്‍ പെട്ടെന്ന് പുത്രന്‍ (6 വയസ്സുകാരന്‍) പുറത്തേക്ക് ചൂണ്ടി അലറി "അവിടെ വലിയ കാക്കകള്‍ നില്ക്കുന്നു". ഇവനാര് കുഞ്ഞു സലിം അലിയോ എന്ന് മനസ്സിലോര്‍ത്തു ഞാന്‍ അങ്ങോട്ട് നോക്കിയപ്പോള്‍ കുറെ ടര്‍ക്കി കോഴികള്‍ (?) റോഡിന്റെ മറുവശത്തെ പുല്‍ത്തകിടിയില്‍ ഇരുന്നു വെയില്‍ കായുന്നു. ഏതായാലും അങ്ങനെ അമേരിക്കയില്‍ വന്നിട്ട് ടര്‍ക്കി കാണാന്‍ പറ്റാത്ത വിഷമം തീര്‍ന്നല്ലോ എന്ന് സമാധാനിച്ചു ഡ്രൈവിങ്ങ് ശ്രദ്ധിച്ചപ്പോള്‍ സലിം അലി വീണ്ടും അലറുന്നു! "അവിടെ ഒരു മാന്‍ ചത്തു കിടക്കുന്നു!". ഞാന്‍ റിയര്‍ വ്യൂ മിററില്‍ നോക്കിയപ്പോള്‍ അതാ ഒരു മാന്‍കുട്ടി വഴിയരികില്‍ (വണ്ടിയിടിച്ചായിരിക്കണം) ചത്തു കിടക്കുന്നു. മാന്‍കുട്ടി-ടര്‍ക്കി; ടര്‍ക്കി -മാന്‍കുട്ടി.....ഇല്ലാത്ത തലച്ചോര്‍ വര്‍ക്കു ചെയ്യിക്കാന്‍ ഞാനൊരു ശ്രമം നടത്തി! കഴുകനെക്കുറിച്ചും കോണ്ടുറിനെക്കുറിച്ചും മറ്റുമുള്ള ബ്ലോഗ് പോസ്റ്റുകള്‍ ഓര്‍മയില്‍ ഓടിയെത്തി. മത്തി, കപ്പ, ടര്‍ക്കി, കഴുകന്‍ ഇവയെല്ലാം മനസ്സില്‍ മാറി മറിഞ്ഞു. ഇതിനിടയ്ക്കു ഡ്രൈവിങ്ങും ശ്രദ്ധിക്കണം! എന്റെയൊരു ബുദ്ധിമുട്ട്‌! ഏതായാലും ഇന്നു കപ്പയും മത്തിയും വാങ്ങി തിരിച്ചു വരുമ്പോള്‍ ഇവരുന്ടെന്കില്‍ വണ്ടി നിര്‍ത്തി ഒന്നു നോക്കാം എന്ന് തീരുമാനം ഉറപ്പിച്ചു.

വണ്ടി നിര്‍ത്തിയപ്പോള്‍ അവര്‍ അല്‍പ്പം അകലെ മാറി നിന്നു.

അങ്ങനെ പെട്ടെന്ന് തന്നെ കപ്പയും മത്തിയും മാത്രം വാങ്ങി തിരുമ്പി വരുമ്പോള്‍ ഒരു ടര്‍ക്കി അതാ മാന്‍ കുട്ടിയുടെ അടുത്തെത്തി കൂടെ ഒരു സുഹൃത്ത് കാവലും. വണ്ടി പതുക്കെ ഹാര്‍ഡ് ഷോള്ഡറില്‍ ഒതുക്കി നിര്‍ത്തി വണ്ടിയിലിരുന്നു തന്നെ നിരീക്ഷണം തുടര്‍ന്നു. ടര്‍കികള്‍ ചിറകു വിരിച്ചു പൊക്കിപ്പിടിച്ച് മാന്‍കുട്ടിക്കു ചുറ്റും നടന്നപ്പോള്‍ കുഞ്ഞ് സലിം അലി വീണ്ടും ശബ്ദിച്ചു "ജംഗിള്‍ ബൂകിലെ വള്‍ചറിനെപ്പോലെ ഉണ്ട്". അപ്പോഴാണ്‌ "സംശയമില്ല ഇതു കഴുകന്‍ തന്നെ എന്ന് തോന്നിയത്!" ക്യാമറ കയ്യിലില്ലാത്തതില്‍ വിഷമം തോന്നി അപ്പോഴാണ്‌ കയ്യില്‍ പുതിയ സെല്‍ ഫോണ്‍ "ബ്ലാക്ക്‌ ബെറി സ്റ്റോം" ആണല്ലോ എന്നോര്‍ത്തത്. ( എനിക്ക് ഒട്ടും പൊങ്ങച്ചമില്ല എന്ന് ഇപ്പോള്‍ മനസ്സിലായല്ലോ? DVD ഉള്ള വണ്ടിയും ബ്ലാക്ബെറി സ്റോമും കയ്യിലുണ്ടെന്ന് അറിയിക്കാന്‍ എനിക്ക് ഒരു ഉദ്ദേശവുമില്ലായിരുന്നു! അതൊക്കെ ഇവിടെ സര്‍വ സാധാരണമാണ്.) പിന്നെ പറ്റുന്നത് പോലെയൊക്കെ ക്ലിക്ക് ചെയ്തു. ഓരോ വണ്ടികള്‍ കടന്നു പോകുമ്പോളും അവര്‍ റോഡ് സൈഡില്‍ നിന്നും അല്‍പ്പം അകലേക്ക് മാറി നിന്നിരുന്നു. പത്തു മിനിട്ടോളം അവര്‍ മാന്‍ കുട്ടിയെ കൊത്തിപ്പറിച്ചു. അതിന് ശേഷം പറന്നു പുല്‍ത്തകിടിയില്‍ പോയി വിശ്രമിച്ചു. കൊടും തണുപ്പിനെ അവഗണിച്ച് ഞാന്‍ പുറത്തിറങ്ങി മാന്‍ കുട്ടിയുടെ ദയനീയ രംഗവും പകര്‍ത്തി അവിടെ നിന്നും പോന്നു.

"ഒരുത്തന്‍ പറന്നകന്നു"

വീട്ടിലെത്തി ഉടന്‍ തന്നെ ഈ പ്രത്യേക ടര്‍ക്കി കുട്ടന്മാരെകുറിച്ചു അന്വേഷണം ആരംഭിച്ചു.കഥാനായകന്റെ പേര് ടര്‍ക്കി വള്ചര്‍ (Turkey vulture അല്ലെങ്കില്‍ Cathartes aura). ഞാനാദ്യമായിട്ടു കാണുകയാണെങ്കിലും ഇവര്‍ അമേരിക്കയില്‍ ധാരളമുണ്ടത്രേ! ഗൂഗിളില്‍ സെര്‍ച്ച് ചെയ്തപ്പോള്‍ കിട്ടിയ കുറെ വിവരങ്ങള്‍ നിങ്ങള്‍ക്കായി പങ്കു വയ്ക്കുന്നു! ടര്‍ക്കി വള്ചര്‍ ഏതാണ്ട് മൂന്നു നാലു കിലോ തൂക്കമുള്ള, 3 അടിയോളം നീളമുള്ള ( ആറടിയോളം വിന്ഗ് സ്പാന്‍ ഉള്ള) ചുവന്ന തലയുള്ള ഒരു തരം വള്ചര്‍ ആണ്. തലയുടെ കളറും ചുണ്ടും ടര്‍ക്കി കോഴിയെ അനുസ്മരിപ്പിക്കുന്നു. കറുപ്പിനോടടുത്ത ബ്രൌണ്‍ കളറാണ് തൂവലിന്. ചുണ്ടിനു ഐവറി കളര്‍. (ഇതൊക്കെ കാണണമെങ്കില്‍ ഞാനെടുത്ത ചിത്രം പോരാ. ഈ ചിത്രം നോക്കുക.) മറ്റു കഴുകന്മാരെപ്പോലെ ഇവരും കഷണ്ടിതലയന്മാരാണ്. മൃത ശരീരങ്ങള്‍ തന്നെയാണ് ഇവര്‍ക്കും പഥ്യം. (ശവശരീരത്തില്‍ നിന്ന്, തല ഉള്ളില്‍ കടത്തി, ഭക്ഷിക്കുമ്പോള്‍ തലയില്‍ തൂവലില്ലതിരിക്കുന്നതാണ് അവിടെ അവശിഷ്ടങ്ങള്‍ പറ്റിപ്പിടിക്കതിരിക്കാന്‍ ഉത്തമം!) ഇരയെ ഇവ സാധാരണയായി ആക്രമിച്ചു കൊല്ലാറില്ല. അസാമാന്യ ഘ്രാണ ശക്തിയുള്ള ഇക്കൂട്ടര്‍ മണം പിടിക്കുന്നതില്‍ മറ്റു കഴുകന്മാരെക്കാള്‍ മൂന്നിരട്ടി മുന്‍പിലാണ്. ഇവരുടെ കാഴ്ച ശക്തിയും അപാരം തന്നെ!

"ഇനി തുടങ്ങാം"

ഏതാണ്ട് 20-21 വയസ്സാണ് ശരാശരി ആയുസ്സ്. ചിറകുകള്‍ V ഷെയിപ്പില്‍ പിടിച്ചു മണിക്കൂറുകളോളം പറക്കാന്‍ ഇവയ്ക്കു കഴിയും.അറുപതു മൈല്‍ സപീഡില്‍ വരെ പറക്കുന്ന ഇവര്‍ക്ക് ഏതാണ്ട് 6 മണിക്കൂറോളം ചിറകടിക്കാതെ പറന്നു നില്ക്കാന്‍ കഴിയുമെന്നും വായിച്ചു! (ഇതൊക്കെ എങ്ങനെ അളക്കുന്നോ ആവോ!)

"ശ്ശെ! .. വീണ്ടും ഡിസ്റര്‍ബന്സ്"

ടര്‍ക്കി വള്ചര്‍ കൂട്ടമായി ചേക്കേറുന്നവരാണ്. ഇര തേടുവാന്‍ മാത്രം ഒറ്റ തിരിഞ്ഞു ഇറങ്ങാറുണ്ട്‌. ചിറകു പൊക്കി വിരിച്ചു പിടിച്ചു ഇവരുടെ നില്‍പ്പ് പ്രസിദ്ധമാണ്. "ഹൊറാള്‍ടിക് പോസ്" എന്നാണിതറിയപ്പെടുന്നത്. ഇതു ചിറക് ഉണക്കുന്നതിനും ശരീരം ചൂടാക്കുന്നതിനും ബാക്ടീരിയ കളയുന്നതിനും കൂടിയാണ്.

"ആഹാ! യമ്മീ!!"

ശത്രുക്കളെയും മറ്റു ജീവികളെയും അകറ്റാന്‍ ഇവര്‍ ചെയ്യുന്നത് ഒരു തരം "വാള് വയ്ക്കലാണ്". പകുതി ദഹിച്ച മാംസക്കഷണങ്ങള്‍ ഇവര്‍ ചുമച്ചു തുപ്പിവയ്ക്കും. "മനം മയക്കുന്ന" ഈ നാറ്റം സഹിക്കാന്‍ വയ്യാതെ ഒരു മാതിരിപെട്ട ഒരുത്തരും അടുത്ത് വരില്ല പോലും! എന്നിട്ടും അടുത്ത് വരുന്നവരുടെ കണ്ണിലും വായിലും വാള് വയ്ക്കുന്ന പതിവുമുണ്ടാത്രേ! ഇതും പോരാഞ്ഞ് വയറ്റില്‍ ദഹിക്കാതെ കിടക്കുന്ന വലിയ മാംസക്കഷണങ്ങള്‍ അയവെട്ടി പുറത്തെടുത്തു മറ്റുള്ളവര്‍ക്ക് കഴിക്കാന്‍ കൊടുത്തു സ്വന്തം ഇരയില്‍ നിന്നും അവരുടെ ശ്രദ്ധ തിരിപ്പിക്കുന്ന "ദാനശീലര്‍" കൂടിയാണിവര്‍!

"ഇവിടെ ഭയങ്കര ശല്യമാണല്ലോ"

സ്വന്തം കാലില്‍ മൂത്രമൊഴിക്കുന്ന സ്വഭാവവും ഇക്കൂട്ടര്‍ക്കുണ്ട്. ബാഷ്പീകരണം മൂലം ശരീരം തണുക്കുന്നതിനും മൂത്രത്തിലുള്ള സ്ട്രോങ്ങ്‌ ആസിഡ് ശവശരീങ്ങളില്‍ നിന്നും കിട്ടിയ ബാക്ടീരിയ നീക്കം ചെയ്യുന്നതും കൊണ്ടാണീ പ്രത്യേക പരിപാടി.

"ഇനി പിന്നെ വരാം"

ഞാന്‍ മനസ്സിലാക്കിയിരുന്നത് ശവശരീരം കാണുമ്പോള്‍ മാത്രമാണ് കഴുകന്മാര്‍ വട്ടമിട്ടു പറക്കുന്നതെന്നായിരുന്നു. എന്നാല്‍ നീണ്ട പറക്കലിന് മുന്നോടിയായും ഭക്ഷണം അന്വേഷിച്ചും പിന്നെ കളിക്കുമ്പോളും ഇവര്‍ വട്ടമിട്ടു പറക്കാറുണ്ടെന്നത് പുതിയ അറിവായിരുന്നു.

പാവം മാന്‍കുട്ടി

അന്താരാഷ്ട്ര ദേശാടന പക്ഷി സംരക്ഷണ നിയമമനുസരിച്ച് ടര്‍ക്കി വള്ചര്‍ അമേരിക്കയില്‍ സംരക്ഷിതരാണ്. അമേരിക്കയില്‍ ഈയടുത്തകാലത്തു ഇവരുടെ എണ്ണം ഏതാണ്ട് രണ്ടു ശതമാനത്തോളം വര്‍ധിച്ചിട്ടുണ്ട്!

(വിവരങ്ങള്‍ക്ക് കടപ്പാട് : വികിപിഡിയ ഉള്‍പ്പെടെയുള്ള പല സൈറ്റുകള്‍ )

ഡെലവെയര്‍ വാട്ടര്‍ ഗ്യാപ്പില്‍ നിന്നുള്ള ഫാള്‍ ചിത്രങ്ങള്‍.

2008-12-20T05:43:00.000-08:00

ഇന്നലെ ഭയങ്കര മഞ്ഞു വീഴ്ചയായിരുന്നു. ഇവിടെ ഏതാണ്ട് നാല് ഇഞ്ചോളം! നോര്‍ത്തേണ്‍ ന്യൂ ജെഴ്സിയിലും ന്യൂ യോര്‍ക്കിലും ഏതാണ്ട് ഒരടി വരെ വീണിരുന്നു. മഞ്ഞു നീക്കി ക്ഷീണിച്ചിരുന്നു പഴയ ഡിസ്കുകള്‍ തപ്പിയപ്പോള്‍ ആ നല്ല ശിശിരകാലത്തിന്റെ ബാക്കിപത്രമെന്നപോലെ രണ്ട് വര്‍ഷങ്ങള്‍ക്കു മുന്പുള്ള പടങ്ങള്‍ (നഷ്ടപ്പെട്ടു എന്ന് കരുതിയിരുന്നവ) കിട്ടി. ഡെലവെയര്‍ വാട്ടര്‍ ഗ്യാപ് നാഷണല്‍ പാര്‍കില്‍, കിറ്ററ്റിന്നി മലയുടെ അടിവാരത്തു നിന്നും എടുത്തവ.

മലനിര മുറിച്ചു പുഴ ഒഴുകുന്ന പ്രദേശത്തിന് വാട്ടര്‍ ഗ്യാപ് എന്ന് വിളിക്കുന്നു. ഡെലവെയര്‍ വാട്ടര്‍ ഗ്യാപ് ന്യൂ ജേഴ്സി, പെന്‍സില്വേനിയ സംസ്ഥാനങ്ങളുടെ അതിര്‍ത്തിയിലാണ്. ധാരാളം ടൂറിസ്റ്റുകള്‍ ജലക്രീഡകള്‍ക്കും, കാമ്പിങ്ങിനും, മീന്‍ പിടുത്തത്തിനും എത്തുന്ന സ്ഥലം!

"നീലജലാശയത്തില്‍..."

"ശിശിരമേ...നീ...ഇതിലെ വാ..."

ഫോട്ടോഫിഡില്‍

2008-12-15T10:04:00.001-08:00

ഫോട്ടോഫിഡിലിനെക്കുറിച്ചുനേരത്തെ കേട്ടിരുന്നെങ്കിലും ഇന്നലെ വീണ്ടും റേഡിയോയില്‍ കേട്ടപ്പോള്‍ മുതല്‍ ബൂലോകത്തെ കൂട്ടുകാരുമായി ഇതു പങ്കു വയ്ക്കണമെന്നുള്ള ആഗ്രഹം ഇരട്ടിച്ചു. കൂടാതെ ഒരു സുഹൃത്ത് ഫോട്ടോഫിഡില്‍ ചെയ്ത വര്‍ക്കിനെപ്പറ്റി പുകഴ്ത്തുന്നതും കൂടി കേട്ടപ്പോള്‍ ഇനി താമസിക്കേണ്ട എന്ന് കരുതി!

ഫോട്ടോഫിഡില്‍ (photofiddle.com) ഇപ്പോള്‍ ഏറ്റവും കൂടുതല്‍ ആളുകള്‍ ഉപയോഗിക്കുന്ന ഫോട്ടോ ആര്‍ട്ട് വെബ് സൈറ്റ് ആണത്രേ! ഈ സൈറ്റില്‍ നിങ്ങള്ക്ക് ഫ്രീ ഓണ്‍ലൈന്‍ സോഫ്റ്റ്‌വെയര്‍ ഉപയോഗിച്ചു ഫോട്ടോകള്‍ ആര്‍ട്ട് വര്ക്ക് ആക്കി മാറ്റിയെടുക്കാന്‍ പറ്റും! ഫോട്ടോഫിഡില്‍.കോം സൈറ്റില്‍ മുപ്പതില്‍ പരം ആര്‍ട്ട് സ്റ്റൈലില്‍ നിങ്ങളെടുത്ത ഫോട്ടോ മാറ്റിയെടുക്കാം. നിങ്ങള്‍ അഡോബിയോ മറ്റു സോഫ്റ്റ്വെയറുകളൊ പഠിക്കേണ്ട ആവശ്യമില്ല. ഇവരുടെ സൈറ്റില്‍ ഫോട്ടോ അപ്‌ലോഡ് ചെയ്തതിനു ശേഷം വേണ്ട സ്റ്റൈല്‍ തിരഞ്ഞെടുത്തു കുറച്ചു ക്ലിക്കുകള്‍ നടത്തേണ്ട ആവശ്യമേയുള്ളൂ. ക്രെഡിറ്റ് കാര്ഡ് നമ്പരും ഷിപ്പിംഗ് അഡ്രസ്സും കൊടുത്താല്‍ സെലക്റ്റ് ചെയ്ത സ്റൈലിലും ഫ്രെയ്മിലും രൂപപ്പെടുത്തിയ നിങ്ങളുടെ ഫോട്ടോ വീട്ടിലെത്തും.

ഓയില്‍ പെയിന്റിംഗ് സ്റ്റൈല്‍

അമേരിക്കയില്‍ മാത്രമല്ല ലോകത്തെമ്പാടെക്കും ഇവര്‍ ഷിപ്പ് ചെയ്യും. എല്ലാവര്ക്കും അവരുടെ ഇഷ്ട ഫോട്ടോകള്‍ ആര്‍ട്ട് വര്ക്ക് ആക്കി ഭിത്തിയില്‍ തൂക്കാന്‍ പറ്റുക എന്നത് നല്ല ഒരു കാര്യമാണ്. നിങ്ങളുടെ പ്രിയന്കരരുടെയും മറ്റും ചിത്രങ്ങള്‍ ഇങ്ങനെ ആര്‍ട്ട് ഫോമില്‍ മാറി വരുമ്പോള്‍ ഉണ്ടാകുന്ന വ്യത്യാസം വലുതാണ്‌!

വാടര്‍ കളര്‍ സ്റ്റൈല്‍ .

ഇനി അല്പം ചരിത്രം:

ജൂണ്‍ 2004 നു തുടങ്ങിയ സൈറ്റ് അധികം താമസിയാതെ തന്നെ പത്രങ്ങളുടെ ശ്രദ്ധ പിടിച്ചു പറ്റി. വാഷിങ്ങ്ടന്‍ പോസ്റ്റ്, USA ടുഡേ, PC മാഗസിന്‍ തുടങ്ങിയവ പ്രശംസ കൊണ്ടു മൂടി! 2006 ല് ഓപ്ര വിന്‍ഫ്രി തന്റെ "ഓ" ലിസ്റ്റില്‍ പെടുത്തിയതോടെ പ്രശസ്തി പിന്നെയും ഉയര്ന്നു! ഇപ്പോഴത്തെ Alexa ട്രാഫിക് രേടിംഗ് 182995 ആണ്!

ഇമ്പസ്ടോ സ്റ്റൈല്‍

ഈയിടെ ടുഡേ ഷോ "ഏറ്റവും നല്ല DIY (Do it Yourself) Decorating ഐഡിയ" ആയി ഇവരെ തിരഞ്ഞെടുത്തിരുന്നു. CBS ഏര്‍ലി ഷോ "ഏറ്റവും നല്ല Mothers Day ഗിഫ്റ്റ് ഐഡിയ" ആയും! CNBC TV ഷോ ആയ "ദ നെക്സ്റ്റ് ബിഗ് ഐഡിയ " നടത്തിയ തിരഞ്ഞെടുപ്പില്‍ ഫോട്ടോഫിഡില്‍. കോം "മില്യണ്‍ ഡോളര്‍ ഐഡിയ" ആയും തിരഞ്ഞെടുക്കപ്പെട്ടിരുന്നു!

വളരെ user friendly ആയ മെനു ആണ് ഇവരുടെ സൈടിലുള്ളത്. ബേസിക് കമ്പ്യൂട്ടര്‍ അറിവ് മതി ഫോട്ടോ അപ്‌ലോഡ് ചെയ്തു ഓര്‍ഡര്‍ നല്‍കാന്‍ എന്നുള്ളതാണ് ഏറ്റവും നല്ല സംഗതിയായി എനിക്ക് തോന്നിയത്. ആര്‍ട്ട് ഷോപ്പുകളില്‍ നിന്നും പെയിന്റിംഗ് വാങ്ങുന്ന വില വച്ചു നോക്കുമ്പോള്‍ ഇവരുടെ വില അധികമല്ലെന്ന് തോന്നി! പ്രത്യേകിച്ചും സ്വന്തം ചിത്രങ്ങള്‍ ആര്‍ട്ട് ഫോമില്‍ ആക്കി കിട്ടുന്ന കാര്യം കൂടി ആലോചിക്കുമ്പോള്‍!

ഫോട്ടോഫിഡില്‍ പരസ്യ വീഡിയോ ഇവിടെ കാണാം.

ചിതങ്ങള്‍ക്ക് കടപ്പാട് : photofiddle.com

ആമിഷുകളുടെ നാട്ടില്‍

2008-11-26T11:46:00.000-08:00

ആമിഷുകളെപ്പറ്റി എന്നാണു ആദ്യമായി കേട്ടതെന്നു ഇപ്പോഴും സംശയമാണ്. കോളേജ് ജീവിതത്തിന്നിടയില്‍ കണ്ട സിനിമയില്‍ നിന്നോ വായിച്ച ബുക്കില്‍ നിന്നോ ആണെന്ന് തോന്നുന്നു. അമേരിക്കയില്‍ എന്നെങ്കിലും പോകുകയാണെങ്കില്‍ ഇക്കൂട്ടരെ ഒന്നു കാണണമെന്ന് അന്നേ തീരുമാനിച്ചിരുന്നു. ഇവിടെ വന്നിട്ട് കുറെ നാളായെങ്കിലും പല തവണ മാറ്റി വച്ച ആമിഷ് ഗ്രാമ സന്ദര്‍ശനം നടത്താന്‍ പറ്റിയത് ഈ വര്‍ഷം ഏപ്രിലില്‍ ആണ്. ഏപ്രിലിലെ ഒരു ശനിയാഴ്ച യാത്ര പുറപ്പെട്ടു sight & sound തിയേറ്റര്‍, ഹെര്‍ഷേയ്സ് ചോക്ലേറ്റ് ഫാക്ടറി, ആമിഷ് ഗ്രാമം എന്നിവ, രണ്ടു ദിവസം പെന്‍സില്വേനിയ കറങ്ങി, കണ്ടു.

സന്ദര്‍ശകര്‍ക്കായി ഒരുക്കിയിരിക്കുന്ന ആമിഷ് വില്ലേജിന്റെ പ്രവേശന കവാടം.

അന-ബാപ്ടിസ്റ്റ് (വിശ്വാസികള്‍ പ്രായപൂര്‍ത്തിയായതിനു ശേഷം മാമ്മോദീസ സ്വീകരിക്കുന്ന കൂട്ടം) എന്നറിയപ്പെടുന്ന ഒരു ക്രിസ്ത്യന്‍ സമൂഹത്തിലെ ഒരു വിഭാഗമാണ്‌ ആമിഷുകള്‍. ഇവര്‍ ലളിത ജീവിതം ഇഷ്ടപ്പെടുന്നവരാണ്. നൂതന സാങ്കേതിക വിദ്യകളോട് അകന്നു പഴമകള്‍ പിന്തുടര്‍ന്ന് വരുന്ന ഒരു സമൂഹം. പണ്ടു മുതലേ വൈദ്യുതി ഉപയോഗം ഇവര്‍ ഒഴിവാക്കിയിരുന്നു. അത് കൊണ്ടു തന്നെ ടെലിവിഷന്‍, കമ്പ്യൂട്ടര്‍, ടെലിഫോണ്‍ എന്നിവയില്‍ നിന്നൊക്കെ ഇവര്‍ അകന്നു കഴിയുന്നു. (എന്നാല്‍ ചുരുക്കം ചില ഗ്രൂപ്പ് ഇവ ഉപയോഗിക്കുന്നുമുണ്ട്). ഇവരില്‍ തന്നെയുള്ള പല സമൂഹങ്ങള്‍ തമ്മിലും ഇങ്ങനെയുള്ള പല വ്യത്യാസങ്ങള്‍ കാണാം.

ആമിഷ് സ്ടോറിനു മുന്‍പിലെ ആമിഷ് സ്ത്രീ പുരുഷ പ്രതിമകള്‍

അമേരിക്കയില്‍ ഏതാണ്ട് 21 സംസ്ഥാനങ്ങളില്‍ ആമിഷുകള്‍ ഉണ്ടെന്നാണ്‌ അറിഞ്ഞത്. ഏറ്റവും കൂടുതല്‍ ആമിഷുകള്‍ ഉള്ളത് പെന്‍സില്വേനിയ സംസ്ഥാനത്തിലാണ്. ഏകദേശം 44,000 ആമിഷുകള്‍ ഈ സംസ്ഥാനത്തുണ്ട്. (പെന്‍സില്വേനിയ സംസ്ഥാനം ബൂലോഗ പുലികളാലും സമൃദ്ധം! ഇവിടെ തന്നെയാണെന്നു തോന്നുന്നു നമ്മുടെ ഫോട്ടോ പുലികളായ സപ്തവര്‍ണങ്ങളും, യാത്രാമൊഴിയും പിന്നെ പുലി ദമ്പതികള്‍ കുട്ട്യേടത്തിയും മന്‍ജീതും).

ഏക മുറി വിദ്യാലയം

പെന്‍സില്വേനിയയിലെ സ്ട്രാസ്ബെര്‍ഗ്, റോന്‍ക്സ് എന്നിവിടങ്ങളിലെ ആമിഷ് പ്രദേശങ്ങള്‍ ഞങ്ങള്‍ സന്ദര്‍ശിച്ചിരുന്നു. ഇവിടുത്തെ ആമിഷുകള്‍ കൃഷിക്കും സവാരിക്കുമായി കുതിരകളെ ഉപയോഗിക്കുന്നു. ഇവരുടെ കുതിരവണ്ടികള്‍ ബഗ്ഗീസ് എന്നറിയപ്പെടുന്നു. ആമിഷുകള്‍ യന്ത്രവാഹനങ്ങള്‍ ഓടിക്കാറില്ല (പക്ഷെ ആവശ്യമെങ്കില്‍ ടാക്സി ഉപയോഗിക്കാം. പക്ഷെ ഞായറാഴ്ചകളില്‍ അതും പാടില്ല!). പുറം ലോകവുമായുള്ള സമ്പര്‍ക്കം ലളിത ജീവിതത്തിന്നു തടസ്സമാവുമെന്നതിനാല്‍ അതില്‍ നിന്നും കഴിവതും ഇവര്‍ ഒഴിവായി നില്ക്കുന്നു. മണ്ണെണ്ണ, പെട്രോള്‍ തുടങ്ങിയവ ഉപയോഗിച്ചുള്ള ഫ്രിഡ്ജ്‌, കൃഷി യന്ത്രങ്ങള്‍ (കുതിരയോ മനുഷ്യരോ തള്ളുകയോ വലിക്കുകയോ ചെയ്യുന്ന) എന്നിവ ഉപയോഗിക്കാറുണ്ടിവര്‍. ഔട്ട് ഗോയിംഗ് കോള്‍സ് മാത്രമുള്ള ഫോണും കണ്ടു. സൈനിക സേവനത്തിനും ഇവര്‍ എതിരാണ്.

പുരുഷന്മാരുടെ വസ്ത്രങ്ങള്‍

ഇവര്‍ തമ്മില്‍ സംസാരിക്കുന്നത് പെന്‍സില്‍വേനിയ ഡച്ച് എന്ന ഭാഷയാണ്. മിക്കവര്‍ക്കും ഇംഗ്ലീഷ് അറിയാം. സ്വിസ്-ജര്‍മന്‍ പാരമ്പര്യം ഇവര്‍ പിന്തുടര്‍ന്ന് പോരുന്നു.ഇവര്‍ക്ക് ദേവാലയങ്ങളില്ല. കൂട്ട പ്രാര്ഥനകള്‍ ഏതെങ്കിലും വീട്ടില്‍ ഒത്തു കൂടി നടത്തുന്നു. എട്ടാം ക്ലാസ്സ് വരെ മാത്രം കുട്ടികള്‍ പഠിക്കുന്നു. വിദ്യാലയങ്ങള്‍ മിക്കവാറും ഏക മുറി വിദ്യാലയങ്ങളാണ്. പ്രായപൂര്‍ത്തിയായതിനു ശേഷം ഇവര്‍ യുവതീ യുവാക്കളെ പുറം ലോകത്തെക്കുറിച്ച് അറിയാനായി അനുവദിക്കുന്നു. ഈ സമയത്തു പുറത്തു പോകുന്നവര്‍ ആമിഷുകളില്‍ നിന്നു പുറം തള്ളപ്പെടും. എങ്ങനെ പുറം തള്ളപ്പെട്ടതിനു ശേഷം മാനസാന്തരപ്പെട്ടു തിരിച്ചു വന്നവരും ഉണ്ട്!

ആമിഷ് വസ്ത്രങ്ങള്‍

പുറം ലോക പരിചയത്തിനു ശേഷം ആമിഷ് യുവതീ യുവാക്കളുടെ വിവാഹം നടത്തുന്നു. ആമിഷുകള്‍ പുറം ലോകരുമായി വിവാഹം അനുവദിക്കില്ല. സാധാരണയായി വിവാഹങ്ങള്‍ നവംബര്‍ ഡിസംബര്‍ മാസങ്ങളില്‍ വിളവെടുപ്പിനുശേഷം ചൊവ്വ്വാഴ്ചയോ വ്യാഴാഴ്ചയോ നടത്തുന്നു. (വളരെ ലളിതമായ രീതിയില്‍ ആഭരണങ്ങളൊന്നുമില്ലാതെ കുറച്ചു പൂക്കള്‍ മാത്രം ഉപയോഗിച്ച്!).

കുക്കിംഗ് റേഞ്ച്

ഇവരുടെ വിശ്വാസമനുസരിച്ച് ധരിക്കുന്ന വസ്ത്രങ്ങള്‍ നിറം,ഘടന എന്നിവയാല്‍ ശ്രദ്ധ പിടിച്ചു പറ്റുന്നവയാകരുത്. പ്രിന്റ് ഡിസൈന്‍ എന്നിവയുള്ള വസ്ത്രങ്ങള്‍ ആനുവദനീയമല്ല. സ്ത്രീകള്‍ കണങ്കാല്‍ വരെയെത്തുന്ന ഏപ്രണ്‍ (കറുപ്പോ നീലയോ വെളുപ്പോ),പുരുഷന്മാര്‍ ഇരുണ്ട ട്രൌസര്‍, വെസ്റ്റ് കോട്ട്, സസ്പെന്ഡര്‍, തൊപ്പി, കറുത്ത ബൂട്ട് എന്നിവ ധരിക്കുന്നു. കല്യാണം കഴിക്കുന്നത്‌ വരെ പുരുഷന്മാര്‍ ക്ലീന്‍ ഷേവ് ചെയ്യുന്നു. വിവാഹിതരായ പുരുഷന്മാര്‍ താടി വളര്‍ത്തും. പക്ഷെ മീശ പാടില്ല! (മീശ സൈന്യവും പൊങ്ങച്ചവുമായി ബന്ധപ്പെട്ടതാണത്രെ!). ഇവര്‍ വീടുകളില്‍ രൂപങ്ങളോ, പെയിന്റിംഗുകളോ തൂക്കാറില്ല. ഫോട്ടോ എടുക്കുന്നതിനും ഇവര്‍ എതിരാണ്. (അതിനാല്‍ ഞങ്ങള്‍ സന്ദര്‍ശിച്ച വീട്ടില്‍ വച്ചു ഫോട്ടോ ഒന്നും എടുത്തില്ല-പകരം സന്ദര്‍ശകര്‍ക്കായി ഒരുക്കിയിരിക്കുന്ന ആമിഷ് വില്ലേജില്‍ വച്ചെടുത്ത ഫോട്ടോകളും ഞാന്‍ കുത്തിവരച്ച ആമിഷ് ദമ്പതികളുടെ ഒരു ചിത്രവും ഇവിടെ കാണാം).

പെട്രോള്‍ ഉപയോഗിച്ചുള്ള ഇസ്തിരിപ്പെട്ടി

സോഷ്യല്‍ സെക്യൂരിറ്റി പെയ്മെന്റ്, ഗവണ്മെന്റ് ആനുകൂല്യങ്ങള്‍, ഇന്‍ഷുറന്‍സ് എന്നിവയിലൊന്നും ഇവര്‍ വിശ്വസിക്കുന്നില്ല. അതിനാല്‍ ഇവരില്‍ ചില ഗ്രൂപ്പുകള്‍ ചികില്‍സയ്ക്കായി ഇവരുടെ ഇടയില്‍ തന്നെ പിരിവെടുത്തു പണം സ്വരൂപിക്കാറുണ്ട്. (അത്യാവശ്യ സന്ദര്‍ഭങ്ങളില്‍ ഇവര്‍ മോഡേണ്‍ മെഡിസിന്‍ ഉപയോഗിക്കും).

മണ്ണെണ്ണ കൊണ്ടു പ്രവര്‍ത്തിക്കുന്ന ഫ്രിഡ്ജ്‌

ചെറുകിട കൃഷിക്കാര്‍ മുതല്‍ വന്‍ഭൂവുടമാകളായ മില്യണയര്മാര്‍ വരെ ഇക്കൂട്ടരിലുണ്ട്. കൃഷി നഷ്ടമായി തുടങ്ങിയപ്പോള്‍ ചിലര്‍ ഫാക്ടറി തൊഴിലാളികളായും കരകൌശല വസ്തുക്കള്‍ ഉണ്ടാക്കുന്നവരായും മാറി. ആമിഷുകളുടെ ഹാന്‍ഡ് മെയിഡ് ക്വില്‍റ്റ് വളരെ പ്രസിദ്ധമാണ്. ധാരാളം സന്ദര്‍ശകര്‍ വരുന്നതിനാല്‍ ഇവരുണ്ടാക്കിയ വസ്തുക്കള്‍ നന്നായി വിറ്റു പോകുന്നു. സന്ദര്ശകര്‍ക്കായുണ്ടാക്കിയ ആമിഷ് വില്ലേജും ആമിഷ് സ്ടോറുകളും കൃഷിയിട സന്ദര്‍ശനങ്ങളും ആമിഷുകളുടെ കൂടെ ഒരു ദിവസം താമസം പരിപാടിയുമൊക്കെയായി ടൂറിസം ഇവിടെ പൊടിപൊടിക്കുന്നു!

( ഇതെല്ലാം കണ്ടപ്പോള്‍ പണ്ടു വക്കാരി ഇവിടം സന്ദര്‍ശിച്ചതിനു ശേഷം പ്ര.പ്ര യുടെ പോസ്റ്റില്‍ ഇട്ട കമന്റ് ശരിയാണല്ലോ എന്നോര്‍ത്തു !)

കുതിരവണ്ടി - ബഗ്ഗി

ആമിഷ് ഗ്രാമം സന്ദര്‍ശിക്കുന്നവര്‍ സ്ട്രാസ്ബെര്‍ഗിലുള്ള sight & sound തീയെറ്ററിലെ ബൈബിള്‍ ഷോയും (ജാതി മത ഭേദമന്യേ) കാണുന്നത് നല്ലതാണ്. കൂടാതെ ഹെര്‍ഷേയ്സ് ചോക്ലേറ്റ് ഫാക്ടറി തുടങ്ങി മറ്റനവധി ടൂറിസ്റ്റ് അട്രാക്ഷന്‍സ് ഇവിടെ നിന്നും അധികം ദൂരത്തല്ലാതുണ്ട്!

ജലചക്രം

ആമിഷ് സ്ഥലത്തു മേയുന്ന കുതിര

ഞങ്ങള്‍ കണ്ട ആമിഷ് ദമ്പതികള്‍
( എന്റെ തന്നെ കുത്തിവര )

വിവരങ്ങള്‍ക്ക് കടപ്പാട് : ആമിഷ് വില്ലേജ്, സ്ട്രാസ്ബെര്‍ഗ്; വികിപിഡിയ, ജോര്‍ജ് മാഗി ദമ്പതികള്‍

"ചട്ടിബാനയും" കൂജയും മറ്റും...

2008-11-20T23:43:00.000-08:00

ജാപ്പനീസ് ഫ്ലവര്‍ അറേന്‍ജുമെന്റ് കലയായ ഇക്ക്ബാനയ്ക്കൊരു എതിരാളി ..."ചട്ടിബാന".

"ദീപം...ദീപം...ദീപം! "

"വെയിലും നിഴലും പൂവും ഇലയും"

"പൂക്കറി "

" ഇനി കുറെ പൂജയ്ക്കെടുക്കാത്ത പൂക്കള്‍"

"കൂജകള്‍"

(ചട്ടി പോലെ തന്നെ മണ്ണ് കൊണ്ടുള്ളതല്ലേ! ഇവിടെ കിടക്കട്ടെ...

പുതിയ തലമുറയ്ക്ക് കൂജയേക്കുറിച്ചു വല്ലതും അറിയാമോ ആവോ? )

(എല്ലാം ഡോക്ടര്‍ നസീറിന്റെ ഫോട്ടോകള്‍)

ചില ബഹറിന്‍ സിലൊവെറ്റ് ചിത്രങ്ങളും...മറ്റുള്ളവയും...

2008-11-15T15:08:00.000-08:00

ബൂലോകര്‍ക്കായി ഇതാ ഡോക്ടര്‍ നസീറിന്റെ സിലൊവെറ്റ് (Silhouette) പരീക്ഷണങ്ങള്‍!

"ഉണരുണരൂ...!"

ബഹറിന്‍ മരുഭൂമിയില്‍ ഒരു പ്രഭാതം.

"അത്യുന്നതങ്ങളില്‍ ..."

" ഉദയമായി.... "

"കൌസല്യാ സുപ്രജാ രാമാ, പൂര്‍വ സന്ധ്യാ..."

"ഉദയഗിരി ചുവന്നു...ഭാനുബിംബം വിളങ്ങി..."

"പ്രഭാതം പൊട്ടി വിടരുന്നു ...!!!"

"മരുഭൂമി കണ്ടു മടുത്തോ? എങ്കില്‍ ഇനി ഒരരുവിയും വെള്ളച്ചാട്ടവുമാവാം അല്ലെ?" അല്പം കോണ്ട്രാസ്റ്റ്!

മൂലമറ്റത്തിനടുത്തുള്ള ഒരു ജലപാതം.

"ഇനി അല്‍പ്പം കോടമഞ്ഞ്‌ ..."
വാഗമണ്‍

"ഇനി ഒരു കടലും തിരയും ..."
പാപനാശം

(എല്ലാം ഡോക്ടര്‍ നസീര്‍ എടുത്ത ചിത്രങ്ങള്‍ )

പഴപ്പടങ്ങള്‍!

2008-11-13T16:47:00.000-08:00

ഇന്ത്യയാണ് ലോകത്തിലെ ഏറ്റവും കൂടുതല്‍ പഴങ്ങള്‍ ഉല്‍പ്പാദിപ്പിക്കുന്ന രാജ്യമെന്നത് പുതിയ അറിവായിരുന്നു. ഇതാ കുറെ പഴങ്ങള്‍!

മംഗോസ്റ്റീന്‍ (Mangosteen-Garcinia mangostana)

സമര്‍പ്പണം: മുറ്റത്തെ മംഗോസ്റ്റീന്‍ മരത്തണലില്‍ ചാരുകസേരയില്‍ ഇരുന്നു എഴുതി മലയാളികളെ രസിപ്പിച്ച ആ മഹാനായ കഥാകാരന്‍ ബേപ്പൂര്‍ സുല്‍ത്താന്‍ വൈക്കം മുഹമ്മദ് ബഷീറിന് .

ആനയിലുമ്പി (സ്റ്റാര്‍ ഫ്രൂട്ട് -Averrhoa Carambola)

സമര്‍പ്പണം: ഇലുമ്പിയുടെ ഗുണങ്ങള്‍ ബൂലോകര്‍ക്ക് പങ്കു വച്ച "ഇല്ലനക്കരിക്കും" (എവിടെ പോയോ എന്തോ?) "ദേവനും".

റമ്പുട്ടാന്‍ (Rambutan - Nephelium lappaceum)

സമര്‍പ്പണം : എല്ലാ ബൂലോകര്‍ക്കുമായി!

(എല്ലാം ഡോക്ടര്‍ നസീറിന്റെ ഫോട്ടോകള്‍)

ഹിമവാന്റെ നാട്ടില്‍!

2008-11-12T00:20:00.000-08:00

ഡോക്ടര്‍ നസീറിന്റെ നേപ്പാള്‍ യാത്രയില്‍ നിന്ന് ...

"രംഗപടം : ആര്‍ട്ടിസ്റ്റ് ഹിമവാന്‍"

"നിറമുള്ള രക്ഷകള്‍ "

"തമസോ മാ ജ്യോതിര്‍ ഗമയ "

"ബുദ്ധനും കൂട്ടുകാരും"

"ഗണേശ പൂജ"

"വിടവില്ലാത്ത തലമുറകള്‍"

"കാത്തിരിപ്പ്‌"

"കൂലംകഷമായ ഒരു ചര്ച്ച"

"നേപാളി കരവിരുത്"

" കനക സിംഹാസനത്തില്‍ ...കയറി ഇരിക്കുന്നവന്‍..."

"ഗസല്‍-നേപ്പാളി ശൈലി"

"സൊറ..."

"പയ്യന്‍-ബാലവേല"

"മാര്‍ക്കറ്റ്"

"മണിമാരന്‍ - വലിയ മണിയും ചെറിയ മനുഷ്യനും!"

"എരപ്പാളിയായ ഒരു നേപ്പാളി "

"ഒരു ബുദ്ധ വിഹാരം"

(എല്ലാം ഡോക്ടര്‍ നസീറിന്റെ ഫോട്ടോഗ്രാഫി)

വസന്തം കടന്നു പോകുന്ന വഴി!

2008-11-09T05:14:00.000-08:00

നവംബര്‍ ആയി. തണുപ്പും തുടങ്ങി. ഇലകളൊക്കെ വീഴാന്‍ തയ്യാറായിക്കഴിഞ്ഞിരുന്നു. മിനിയാന്ന് റെയില്‍ റോഡ് ക്രോസ്സിംഗ് കടന്നപ്പോള്‍ ഇതിലും ഇലകളും വര്‍ണങ്ങളും കണ്ടിരുന്നു! ഇന്നലെ രാവിലെ ക്യാമറയുമായി ഇറങ്ങുമ്പോള്‍ ആകാശം മേഘാവൃതം! പിന്നെ ചന്നം പിന്നം മഴയും! അവിടെ എത്തിയപ്പോള്‍ കുറെയേറെ ഇലകള്‍ മഴയില്‍ വീണുപോയിരുന്നു! എങ്കിലും കൊള്ളാമെന്നു (?) തോന്നിയ ഫോട്ടോസ് പോസ്റ്റു ചെയ്യുന്നു!

"വസന്തം കടന്നു പോകുന്ന വഴി!"

ഉലകം ചുറ്റും വാലിബന്‍!

2008-11-05T17:19:00.000-08:00

പല രാജ്യങ്ങളിലെ ദൃശ്യങ്ങള്‍...ഡോ. നസീറിന്റെ ക്യാമറാ കണ്ണിലൂടെ...

"നൂണ്‍ ഷോയ്ക്ക് പോയാലോ...?"- തായ്‌ലാന്‍ഡിലെ സന്യാസിക്കുട്ടികള്‍.

"നവംബറിലെ ഒരു രാത്രി" - ബെര്‍ലിന്‍, ജര്‍മ്മനി.

"കാത്തിരുപ്പ്-തീവണ്ടിക്കായി!" - പ്രാഗ്, ചെക്ക് റിപബ്ലിക്‌.

"ക്രിസ്മസ് രാത്രി"- ദ്രെസ്സ്ടെന്‍, ജര്‍മ്മനി.

"(സ്വര്‍ണ) സന്യാസി പ്രതിമകള്‍"- ഹൊ ചി മിന്‍ സിറ്റി, വിയറ്റ് നാം.

പ്രകൃതീ...മനോഹരീ!

2008-11-02T22:36:00.000-08:00

ഡോക്ടര്‍ നസീറിന്റെ കുറെ പ്രകൃതി ചിത്രങ്ങള്‍!

"കായലും കടലും"

ഇടവ, കൊല്ലം

"Bridge to Nowhere"

കൊച്ചി.

"ദൈവത്തിന്റെ സ്വന്തം നാട്!"
ഇടവ, കൊല്ലം.

"ഒരു കുട്ടനാടന്‍ അസ്തമയം"

"തേടുന്നതാരേ നീ?"
പാപനാശം, കൊല്ലം.

"മഴ പോയ വഴി...കോട മഞ്ഞു വരുന്നതും... "
വാഗമണ്‍.

"ഗംഭീരം...പിന്നെ ശാന്തം!"
ആതിരപ്പള്ളി.

"വാണിഭം"-കേരളത്തില്‍ മാത്രമല്ല!

2008-10-31T21:49:00.000-07:00

തെറ്റിദ്ധരിച്ചോ? ആ വാണിഭമല്ല!

ലോകത്തിന്റെ പല ഭാഗങ്ങളില്‍ നിന്നുള്ള വഴി വാണിഭക്കാര്‍!

"കഴുത്ത് നീട്ടിയ ഷാള്‍ വില്പ്പനക്കരിയും മകളും!"

മ്യാന്മാര്‍.

ക്രിസ്തുമസ് കച്ചവടം 2007

ബെര്‍ലിന്‍, ജര്‍മ്മനി.

"വളക്കച്ചവടക്കാരികള്‍!"
തായ്‌ ലാന്‍ഡ്‌.

"നിറങ്ങള്‍ക്കുള്ളിലെ നിറം"
ബോചെം, ജര്‍മ്മനി.

"വഴിയിലെ നിറങ്ങള്‍"

വിയറ്റ് നാം.

"ഡോക്ടര്‍ നസീറിന്റെ ചിത്രങ്ങള്‍; വീണ്ടും!"

നിറങ്ങള്‍!

2008-10-29T08:40:00.000-07:00

"വില്‍ക്കാനുണ്ട്-നിറങ്ങള്‍!"

കാത്മണ്ഡു, നേപ്പാള്‍

"നിറങ്ങളില്‍ കുരുക്കപ്പെട്ടവ"

രാജസ്ഥാന്‍

(രണ്ടും ഡോ. നസീറിന്റെ ചിത്രങ്ങള്‍!)

അമേരിക്ക "പതനത്തില്‍"!

2008-10-25T19:11:00.000-07:00

അമേരിക്കന്‍ പതന (Fall) കാലത്തെ കാഴ്ചകള്‍.

ന്യൂ ജേഴ്സി Fall നിറങ്ങള്‍!

"പതനം (Fall)"

"ഇതെന്റെ സ്വന്തം പുരയിടത്തില്‍ നിന്നും."

"സംശയിക്കണ്ട ഇലകള്‍ മാത്രം!"

"ഇതും പൂക്കളല്ല!"

"ഇതിന് ഫ്ലയിം റെഡ് എന്ന് പറയാമോ?"

"ഇതും ഇലകള്‍"

"ഇതു മറ്റൊരു തരം!"

"ഫാരിങ്ങ്ടന്‍ ലേയ്ക്ക്"

കുട്ടനാട്, രാജസ്ഥാന്‍, ബഹ്‌റൈന്‍

2008-10-24T09:57:00.000-07:00

" തനിയെ"

കുട്ടനാട്.

"അന്തി നേരത്ത്"അന്തി"ക്കായി..."

കുട്ടനാട്.

""അന്തി"ക്ക് ശേഷം..."
കുട്ടനാട്.

" "ആത്മാവിനല്‍പ്പം പുക; ഒരു ബീഡി ബ്രേക്ക് "
കുട്ടനാട്.

"കൊതുമ്പു വള്ളം തുഴഞ്ഞു വരും..."
കുട്ടനാട്.

" രാജസ്ഥാന്റെ നിറങ്ങള്‍"

" സായാഹ്ന സവാരി!" ബഹ്‌റൈന്‍

(എല്ലാം ഡോക്ടര്‍ നസീറിന്റെ
ഫോട്ടോഗ്രാഫുകള്‍ )

വീണ്ടും ചില ചിത്രങ്ങള്‍ കൂടി!

2008-10-22T17:19:00.000-07:00

"ങ്ങള് ഇവിടെ പുതിയ ആളാ? ഈ മഴയൊന്നും കണ്ടിട്ടില്ലേ?"

(ഫോട്ടോഗ്രാഫര്‍ : ഡോക്ടര്‍ നസീര്‍ )

"നിറങ്ങള്‍ക്കുള്ളിലെ നിറമില്ലാത്ത ജീവിതം"

ചിയാങ്ങ്മായ്, തായ്‌ ലാന്‍ഡ്‌

(ഫോട്ടോഗ്രാഫര്‍ : ഡോക്ടര്‍ നസീര്‍ )

"കൊച്ചി - ഒരു നരച്ച വെളുപ്പാന്‍കാലത്ത്"

(ഫോട്ടോഗ്രാഫര്‍ : ഡോക്ടര്‍ നസീര്‍ )

ബുദ്ധിസ്റ്റ് മൊണാസ്ട്രി, ബാങ്കോക്ക്‌
(ഫോട്ടോഗ്രാഫര്‍ : ഡോക്ടര്‍ നസീര്‍ )

ചില നല്ല ചിത്രങ്ങള്‍ കൂടി!

2008-10-21T15:56:00.001-07:00

"വരുവാനില്ലാരുമിങ്ങൊരുനാളുമീ വഴി-ക്കറിയാമതെന്നാലുമെന്നും..."

Klementz Platz , Germany

(ഫോട്ടോഗ്രാഫര്‍ : ഡോക്ടര്‍ നസീര്‍)

"സ്ക്കൂള്‍ വിട്ടു വരുന്ന പെണ്‍കുട്ടികള്‍" വിയന്ന, ഓസ്ട്രിയ.

(ഫോട്ടോഗ്രാഫര്‍ : ഡോക്ടര്‍ നസീര്‍)

(എനിക്കീ ഫോട്ടോയാണ് ഏറ്റവും ഇഷ്ടമായത്-അടിക്കുറിപ്പ് വേണ്ടാത്ത ചിത്രം!)

മഞ്ഞുകാലം, Lviv, Ukraine
(ഫോട്ടോഗ്രാഫര്‍ : ഡോക്ടര്‍ നസീര്‍)

"മഞ്ഞുകാലം വരുന്ന വഴി"

ഡ്രെസ്ഡെന്‍, ജര്‍മ്മനി

(ഫോട്ടോഗ്രാഫര്‍ : ഡോക്ടര്‍ നസീര്‍)

"ഒരു നല്ല ഫോട്ടോഗ്രാഫര്‍ കൂടിയായ എന്റെ സുഹൃത്ത് ഡോക്ടര്‍ നസീറിന്റെ കുറച്ചു ഫോട്ടോകള്‍ കൂടി..."

കുറച്ചു നല്ല പടങ്ങള്‍!

2008-10-21T00:49:00.000-07:00

പ്രതിഫലനം!

(ആതിരപ്പള്ളി വെള്ളച്ചാട്ടം)

(ഫോട്ടോഗ്രാഫര്‍ : ഡോക്ടര്‍ നസീര്‍)

"നിലാവില്‍ ഉറങ്ങുന്ന ഇടവാ"

(Midnight photograph)

(ഫോട്ടോഗ്രാഫര്‍ : ഡോക്ടര്‍ നസീര്‍ )

"ഒരു നല്ല ഫോട്ടോഗ്രാഫര്‍ കൂടിയായ എന്റെ സുഹൃത്ത് ഡോക്ടര്‍ നസീറിന്റെ കുറച്ചു ഫോട്ടോകള്‍ ബൂലോകരെ കാണിക്കാനൊരു ശ്രമം..."

അമേരിക്കന്‍ ഗ്രാമക്കാഴ്ചകള്‍

2008-09-01T05:03:00.000-07:00

ഇന്നലെ അടുത്തുള്ള ടൌണ്‍ഷിപ്പിലെ ഉള്‍നാടന്‍ റോഡുകളില്‍ ഡ്രൈവിനു പോയപ്പോള്‍ കിട്ടിയത്...

കാട്ടുപൂക്കള്‍

വീണ്ടും കുറേക്കൂടി!

ഫാരിംഗ്ടോന്‍ ലേക്ക്

ഫാരിംഗ്ടോന്‍ ലേക്ക്

കൂടണയാന്‍ പായുന്ന വാത്തകള്‍...

ജാലകത്തിലൂടെ നോക്കിയപ്പോള്‍...

2008-08-27T11:34:00.000-07:00

വെറുതെ ഒരു ക്ലിക്ക് !

കുറച്ചു പച്ചപ്പ്‌ കൂടി ചേര്‍ത്താല്‍ ഭംഗി കൂടുമോ ആവോ?

മോഷണത്തിനും വ്യക്തിഹത്യക്കുമെതിരെ!

2008-06-10T13:52:00.000-07:00

കേരള്‍സ്. കോമിന്റെ മോഷണത്തിനും വ്യക്തിഹത്യക്കുമെതിരെ ഞാനും പ്രതിഷേധത്തില്‍ പങ്കു ചേരുന്നു.

ഡോഗ് പാര്‍ക്ക്

2008-04-27T21:20:00.000-07:00

ഡോഗ് പാര്‍ക്കിന്റെ കവാടം.

ന്യൂ ജേഴ്സിയിലെ ഈസ്റ്റ് ബ്രന്‍സ്വിക്കിലൂടെ ഡ്രൈവ് ചെയ്യുമ്പോള്‍ പല തവണ ഡോഗ് പാര്‍ക്കിന്റെ ബോര്‍ഡ് കണ്ടിട്ടുണ്ടെങ്കിലും, അവിടം സന്ദര്‍ശിക്കാന്‍ പറ്റിയത് കഴിഞ്ഞ ആഴ്ച മാത്രമാണ്.

വളര്‍ത്തു നായ്ക്കളുടെ വ്യയാമത്തിന്നും ഇടപഴകലിനുമായി (socialising) അമേരിക്കയില്‍ മിക്കവാറും എല്ലാ സംസ്ഥാനങ്ങളിലും ഡോഗ് പാര്‍ക്കുകള്‍ ഉണ്ട്. പല കാരണങ്ങള്‍ കൊണ്ടും പാര്‍ക്കുകള്‍ വളര്‍ത്തു നായകള്‍ക്ക് വളരെ ഉപകാരപ്രദമാണെന്നു ഉടമസ്ഥര്‍ പറയുന്നു. വളര്‍ത്തു മൃഗങ്ങള്‍ വേണ്ടത്ര വ്യയാമമില്ലാതെ അപ്പാര്‍ട്ടുമെന്റിലും വീട്ടിലും മറ്റുമൊതുങ്ങി, തടിച്ചു ചീര്‍ത്തു വരുന്നതില്‍ നിന്നും, അപരിചിതരെ (മനുഷ്യരെയും മൃഗങ്ങളെയും) ശത്രുക്കളെപ്പോലെ കരുതി ആക്രമിക്കുന്നതില്‍ നിന്നും മറ്റും ഒഴിവാക്കുന്നതിന് ഇത്തരം പാര്‍ക്കുകള്‍ സഹായിക്കുന്നുണ്ടത്രെ . (നാട്ടിന്‍പുറങ്ങളിലെപ്പോലെ കള്ളന്മാരെ ഓടിക്കാനല്ല ഇവിടെ നായകള്‍). കൂടാതെ നാണം കുണുങ്ങികളായ നായകളുടെ നാണം മാറ്റിയെടുക്കാനും പാര്‍ക്ക് സന്ദര്‍ശനം സഹായിക്കുന്നു പോലും. വ്യായാമം മാത്രമല്ല നായകളുടെ ബഹുമുഖ വ്യക്തിത്വ വികസനവും കൂടി പാര്‍ക്ക് സന്ദര്‍ശനം മൂലം നടക്കുന്നു!

ഞാന്‍ പോയ പാര്‍ക്ക്‌ ഈസ്റ്റ് ബ്രന്സ്വിക്കിലെ ഹെവന്‍ലി ഫാംസ് എന്ന സംരക്ഷിത തുറസ്സു ( protected open space) പ്രദേശത്തിനടുത്തായിരുന്നു. ഏതാണ്ട് ഒരേക്കറോളമുള്ള സ്ഥലത്തു രണ്ടായി വിഭജിച്ച് ചുറ്റുവേലി കെട്ടി തിരിച്ചതാണ് പാര്‍ക്ക്. ഒരു ഭാഗത്ത് 25 പൌണ്ട് (ഏതാണ്ട് 11.5 കിലോഗ്രാം) വരെയുള്ള നായകള്‍ക്കും മറുഭാഗത്ത് 25 പൌണ്ടിനു മുകളില്‍ ഭാരമുള്ള വലിയ നായകള്‍ക്കുമായി തിരിച്ചിരിക്കുന്നു. ഇരട്ട ഗയിറ്റ് കടന്നു വേണം ഡോഗ് പാര്‍ക്കിനു അകത്തു പ്രവേശിക്കാന്‍ (ഒരു ഗയിറ്റ് തുറന്നു പോയാലും നായകള്‍ ഓടി പുറത്തു പോകാതിരിക്കാനുള്ള മുന്‍കരുതല്‍). ഈസ്റ്റ് ബ്രന്സ്വിക്ക് ടൌണ്‍ഷിപ് തുടല്‍ (leash) ബന്ധിക്കാതെ നായകളെ വീടിനു വെളിയില്‍ വിടുന്നത് നിരോധിച്ചിട്ടുണ്ടത്രേ! (ഞങ്ങള്‍ക്ക് വളര്‍ത്തു മൃഗങ്ങളൊന്നും ഇല്ലാത്തതിനാല്‍ പല വിവരങ്ങളും അറിയില്ലായിരുന്നു). നായകളുടെ ഉടമസ്ഥരല്ലാത്തവര്‍ക്കും അകത്ത് പ്രവേശിക്കാം. പ്രവേശനം ടൌണ്‍ഷിപ് നിവാസികള്‍ക്ക് സൗജന്യമാണ്. രാവിലെ 7 മണി മുതല്‍ രാത്രി 10 മണിവരെ പാര്‍ക്ക് തുറന്നിരിക്കും. 10 വയസ്സില്‍ താഴെ പ്രായമായ കുട്ടികളെ സാധാരണയായി പ്രവേശിപ്പിക്കാറില്ല.

അവിടെ വച്ചു പരിചയപ്പെട്ട റ്റോം ആണ് പാര്‍ക്കിനെപ്പറ്റി കുറെ വിവരങ്ങള്‍ പറഞ്ഞു തന്നത്‌. റ്റോം ഒരു റോക്കറ്റ് മോഡല്‍ മേയ്ക്കര്‍ ആണ്. കൂടാതെ പെറ്റ് ഫോട്ടോഗ്രാഫിയും ചെയ്യുന്നു. ദിവസവും ഒരു മണിക്കൂറെങ്കിലും തന്റെ നായ എയ്സിയുമായി പാര്‍ക്കിലെത്താറുണ്ട് (തണുപ്പുകാലത്തൊഴിച്ചു). അദ്ദേഹത്തിന്റെ അഭിപ്രായത്തില്‍ നായകള്‍ക്കൊപ്പം ഉടമസ്ഥരും പര്‍ക്കിലെത്ത്തുമ്പോള്‍ പെട്ടന്നിടപഴകുന്നു.

പാര്‍ക്കിനുള്ളില്‍ പട്ടികള്‍ക്ക് കളിക്കാനായി ടെന്നീസ് ബോള്‍, ഫ്രിസ്ബി എന്നിവയെല്ലാമുണ്ട്. ഉടമസ്ഥര്‍ കളിപ്പാട്ടങ്ങള്‍ കൊണ്ടുവരുന്നതു പാര്‍ക്ക് അധികൃതര്‍ പ്രോത്സാഹിപ്പിക്കാറില്ല. കരിങ്കല്ലുപൊടി വിരിച്ച പ്രദേശവും ഒരു പുല്‍ത്തകിടിയും നായകള്‍ക്ക് കളിക്കാനായി ഒരുക്കിയിട്ടുണ്ട്. കൂടാതെ നായകള്‍ക്ക് വെള്ളം കുടിക്കാന്‍ ഒരു ഡ്രിങ്കിംഗ് ഫൌണ്ടെന്‍ പിടിപ്പിച്ചിട്ടുണ്ട്.

നായകളുടെ അപ്പി (poop) വാരല്‍ അതിന്റെ ഉടമസ്ഥന്റ്റെ ചുമതലയാണ്. പരിസ്ഥിതി മലിനീകരണമുണ്ടാക്കാത്ത (biodegradable) അപ്പിബാഗ് അവിടെത്തന്നെ സൗജന്യമായി കിട്ടും. ഇവ കൂടാതെ ഉടമസ്ഥനും സന്ദര്‍ശകര്‍ക്കും സൊറ പറഞ്ഞിരിക്കാനുള്ള ബെഞ്ചുകള്‍, ഒരു പബ്ലിക് നോട്ടീസ് ബോര്‍ഡ് എന്നിവയുമുണ്ട്.ഞാന്‍ ചെന്നപ്പോള്‍ പാര്‍കില്‍ അധികം തിരക്കില്ലയിരുന്നു. ടോമിനെ കൂടാതെ മാര്‍ഗെരെറ്റ് എന്ന അമ്മൂമ്മ മാത്രമേയുണ്ടായിരുന്നുള്ളൂ. മാഗി അമ്മൂമ്മ ദിവസവും രണ്ടു നേരം തന്റെ നായ്കളുമായി (ബെല്ലയും ബെയിലും) പാര്‍ക്ക് സന്ദര്‍ശിക്കും. ബെല്ലയുടെ ആക്രമണ സ്വഭാവം മാറ്റിയെടുക്കാന്‍ ഈ സന്ദര്‍ശനങ്ങള്‍ വളരെ ഉപകരിച്ചെന്നു കക്ഷി പറഞ്ഞു. pet care, pet foods, pet medicines എന്നിവയെക്കുറിച്ചു പാര്‍ക്ക് സന്ദര്‍ശനം വഴി വളരെ അധികം വിവരങ്ങള്‍ കിട്ടി എന്നും മാഗി അമ്മൂമ്മ പറഞ്ഞു.

പാര്‍ക്കില്‍ വരുന്ന നായ്കള്‍ മറ്റു മൃഗങ്ങളെയോ മനുഷ്യരെയോ ആക്രമിക്കുകയാണെങ്കില്‍ ആക്രമിച്ച നായുടെ ഉടമസ്ഥനാണ് ഉത്തരവാദിത്വം. സാധാരണയായി കൂടുതല്‍ ആക്രമണ വാസനയുള്ള നായകളെ കുറച്ചു നാള്‍ തുടല്‍ ബന്ധിച്ചു തന്നെ പാര്‍കില്‍ നിര്‍ത്തി ആക്രമണ സ്വഭാവം കുറച്ചതിനു ശേഷമേ തുറന്നു വിടാറുള്ളൂ.

സൂര്യന്റെ ചൂടു കൂടുന്തോറും കൂടുതല്‍ പേര്‍ എത്തിക്കൊണ്ടിരുന്നു. ഉച്ചക്ക് ശേഷം വളരെ തിരക്കാകാറുണ്ടെന്നു മാഗി അമ്മൂമ്മ പറഞ്ഞു. ഞാന്‍ പോരാറായപ്പോഴേക്കും ചെറുപ്പക്കാരും കുട്ടികളുമായി വളരെപ്പേര്‍ എത്തിക്കഴിഞ്ഞിരുന്നു. ചെറുതും വലുതുമായ നായകള്‍ ടെന്നീസ് ബോളും ഫ്രിസ്ബിയുമായി ഓടിക്കളിച്ചുകൊണ്ടിരുന്നു. ചെറിയ മുരളലുകളും ഉരസലുകളുമല്ലാതെ കാര്യമായ കടിപിടി കാണാനില്ലായിരുന്നു. അല്ലെങ്കിലും ഇവിടുത്തെ നായകള്‍ക്ക് തിണ്ണമിടുക്കേയുള്ളൂ പുറത്തിറങ്ങിയാല്‍ പൂച്ചകളെപ്പോലെയാണെന്ന് റ്റോം പറഞ്ഞതോര്‍ത്തു...

ഇന്ത്യയില്‍ ഇത്തരം പാര്‍ക്കുകള്‍ ഉണ്ടോ എന്നെനിക്കറിയില്ല.

ഡോഗ് പാര്‍ക്കിനെക്കുറിച്ചു കൂടുതല്‍ അറിയേണ്ടവര്‍ ഇവിടെ നോക്കുക.

കുറെ ചിത്രങ്ങള്‍ കൂടി...

പുതിയ ഒരംഗം എത്തുന്നു.
എയ്സി അല്‍പ്പം മാറി നില്ക്കുന്നു.

25 പൌണ്ടില്‍ കൂടിയവര്‍
ഞങ്ങള്‍ തിരക്കിലാണ്...

അപ്പിയാപ്പീസ്.

വാട്ടര്‍ ഡ്രിങ്കിങ്ങ് ഫൌന്റൈന്‍
അപ്പി ബാഗ് ഇവിടെ കിട്ടും

റ്റോമേട്ടന്‍
മാഗി അമ്മൂമ്മ റ്റോമേട്ടന്റെ എയ്സിയുമായി

ഇതൊരു തുടക്കം മാത്രം!!!

2008-03-13T09:08:00.000-07:00

"ഒരു നാള്‍ ഞാനും പുലി ചേട്ടന്‍ ( ചേച്ചി) മാരെ പ്പോലെ എഴുതും പുലിയാകും.."

(ഉള്ളില്‍ "പോതമുണ്ട്" പുറത്തേക്ക് വരുന്നില്ല എന്ന് പണ്ടാരോ പറഞ്ഞതോര്‍ക്കുന്നു...)

അപ്പോള്‍ ശരി...തിരക്കിലാണ്....മാളം (മട) പണി കഴിഞ്ഞ്‌ വീണ്ടും കാണാം..

"മീണ്ടും സന്ധിപ്പും വരേയ്ക്കും...വണക്കം!!!"

(കമന്ടയക്ക്‌.. കമന്ടയക്ക്‌...ഒരു ഇന്സ്പിരേഷ്നാകട്ടെ .... )